इंदापूर विधानसभा मतदार संघातील साडेसात हजार मतदार छायाचित्रांविना
मतदारांनी छायाचित्र मुदतीत जमा न केल्यास मतदार यादीतून वगळण्यात येणार

इंदापूर विधानसभा मतदार संघातील साडेसात हजार मतदार छायाचित्रांविना
मतदारांनी छायाचित्र मुदतीत जमा न केल्यास मतदार यादीतून वगळण्यात येणार
इंदापूर : प्रतिनिधी
इंदापूर विधानसभा मतदार संघातील ७ हजार ४४६ मतदारांचे मतदार यादीमध्ये छायाचित्र नाहीत.त्यामुळे मतदार यादी मध्ये रंगीत छायाचित्रे लावण्याची मोहीम हाती घेण्यात आली असल्याचे तहसीलदार अनिल ठोंबरे यांनी सोमवारी ( दि.९ ) पत्रकारांना सांगितले.
ज्या मतदारांचे मतदार यादीमध्ये छायाचित्र नाही, अशा व्यक्तींनी आपल्या मतदान केंद्रातील केंद्रस्तरीय अधिकारी ( बी.एल.ओ ) किंवा गाव कामगार तलाठी यांचेकडे छायाचित्र जमा करण्याचे आवाहन प्रांत अधिकारी दादासाहेब कांबळे तथा इंदापूर विधानसभा मतदार नोंदणी अधिकारी यांनी केले आहे.
संबंधित मतदारांनी मतदार यादी मध्ये रंगीत छायाचित्र लावण्यासाठी तहसील कार्यालय इंदापूर किंवा बीएलओ,गाव कामगार तलाठी यांच्याकडे रंगीत छायाचित्र त्वरित जमा करावीत.त्याचप्रमाणे ज्या मतदारांचे छायाचित्र उपलब्ध नाही अशा मतदारांची पुणे जिल्हाधिकारी ( www.pune.nic.in ) या वेबसाईटवर यादी प्रसिद्ध करण्यात आली आहे. त्यामुळे संबधीत मतदारांनी योग्य मुदतीत छायाचित्र जमा करावे अन्यथा अशा व्यक्तींची नावे मतदार यादीतून वगळण्यात येणार असल्याचे प्रांताधिकारी दादासाहेब कांबळे यांनी सांगितले आहे.