इंदापूर शहरातील रुग्णसंख्या घटल्याने लाॅकडाऊन उठवण्याबाबत येत्या दोन दिवसात निर्णय घेतला जाईल – राज्यमंत्री दत्तात्रय भरणे
राज्यमंत्री दत्तात्रय भरणे म्हणाले, इंदापूर शहरामध्ये काल केवळ १ रुग्ण कोरोना बाधित आढळून आला

इंदापूर शहरातील रुग्णसंख्या घटल्याने लाॅकडाऊन उठवण्याबाबत येत्या दोन दिवसात निर्णय घेतला जाईल – राज्यमंत्री दत्तात्रय भरणे
राज्यमंत्री दत्तात्रय भरणे म्हणाले, इंदापूर शहरामध्ये काल केवळ १ रुग्ण कोरोना बाधित आढळून आला
इंदापूर प्रतिनिधी: बारामती वार्तापत्र
इंदापूर शहर आणि तालुक्यात कोरोना बाधित रुग्णांची संख्या घटल्यामुळे लाॅकडाऊन उठवण्याबाबत येत्या दोन दिवसात निर्णय घेतला जाईल अशी ग्वाही राज्यमंत्री दत्तात्रय भरणे यांनी दिली.पुणे जिल्हा मध्यवर्ती बँकेच्या कार्यालयात शनिवारी दि.०५ रोजी कोरोना आढावा बैठक घेण्यात आली त्यावेळी राज्यमंत्री भरणे बोलत होते.
यावेळी तहसीलदार अनिल ठोंबरे, गटविकास अधिकारी विजयकुमार परीट, नगराध्यक्षा अंकिता शहा,इंदापूर तालुका शिक्षण प्रसारक मंडळाचे सचिव मुकुंद शहा,पुणे जिल्हा नियोजन समितीचे सदस्य सचिन सपकळ,कार्याध्यक्ष अतुल झगडे,शहराध्यक्ष बाळसाहेब ढवळे,पुणे जिल्हा कुस्तिगीर संघाचे सदस्य महेंद्र रेडके,अँड.राहुल मखरे,मुख्याधिकारी रामराजे कापरे,पोलिस निरिक्षक धन्यकुमार गोडसे,जीवन माने,दिलीप पवार,डाॅ.सुहास शेळके,डाॅ.सुनिल गावडे आदींसह पंचायत समिती सदस्य,नगरसेवक,प्रशासकीय अधिकारी,नागरिक उपस्थित होते.
राज्यमंत्री दत्तात्रय भरणे म्हणाले, इंदापूर शहरामध्ये काल केवळ १ रुग्ण कोरोना बाधित आढळून आला. शहरामधील रुग्णसंख्या आटोक्यात आली असली तरी तालुक्यात पाॅझिटीव्ह रुग्णांची संख्या आहे.सध्याची परिस्थिती आटोक्यात आल्यामुळे जिल्हाधिकाऱ्यांशी समन्वय करुन इंदापूर शहर खुले करण्यासाठी दोन दिवसात निर्णय घेतला जाईल. आरोग्य यंत्रणेने तिसऱ्या लाटे संदर्भात सतर्क राहून ठोस उपाययोजना करण्याच्या सुचना मंत्री भरणे यांनी आरोग्य विभागाला दिल्या.
शहर आणि तालुक्यात नागरिकांची गर्दी होणार नाही याकडे पोलीस यंत्रणेने बारकाईने लक्ष द्यावे. नागरिकांनी नियमांचे काटेकोर पालन करावे. यासाठी नागरिकांना सुचना देण्यात याव्यात असेही श्री.भरणे म्हणाले.इंदापूर तालुक्यात म्युकरमायकोसिस चे अकरा रुग्ण आढळले असून सध्या त्यांच्यावर उपचार चालू असले तरी डाॅक्टरांनी त्यांच्याकडे दुर्लक्ष करु नये. कोणत्याही परिस्थितीत उपाययोजना मध्ये हलगर्जीपणा करु नये अशी सुचना श्री.भरणे यांनी केली.
सरसकट दुकाने चालू करण्यास परवानगी द्या – नगराध्यक्षा अंकिता शहा
इंदापूर शहरातील कोरोना बाधित रुग्णांची संख्या नगण्य असल्यामुळे सरसकट बाजारपेठ खुली करण्यास शासनाने परवानगी द्यावी. त्यासाठी मंत्री भरणे यांनी पुढाकार घेऊन तात्काळ निर्यण घ्यावा अशी मागणी नगराध्यक्षा अंकिता शहा यांनी आढावा बैठकीत केली. इंदापूर शहराला गॅस शवदाहिनी मंजूर केल्याबद्दल त्यांनी श्री.भरणे यांचे आभार मानत इंदापूर नगरपरिषदेला कचरा डेपोच्या ठिकाणी बायो सी.एन.जी.प्रकल्पास मंजुरी मिळावी अशी मागणी केली.