उजनी धरणात मांगुर माश्या पाठोपाठ विद्रूप अशा सकर माशाची भर…

उजनी धरणात मांगुर माश्या पाठोपाठ विद्रूप अशा सकर माशाची भर…

मत्स्य विभागाने त्वरित लक्ष देण्याची गरज

इंदापूर : प्रतिनिधी
मानवी आरोग्यास आणि पर्यावरणाला धोका पोहोचवणारा तसेच हरित लवादाने बंदी घातलेला मांगुर मासा नष्ट करण्यासाठी राज्य शासन मोहीमा हाती घेत असताना आता उजनी जलाशयात अजुन एका उपद्रवी व विद्रूप अशा “सकर” या माश्याची भर पडली असून नवीन संकट उजनी धरणावर आता गोंगावत असल्याचे चित्र आहे.

उजनी धरणातील मांगुर मासा कसा नष्ट करायचा ही चिंता सतावत असताना नवीन एक संकट ‘सकर ‘ या माश्यामुळे आले आहे.उजनी जलाशयात हा मासा सापडू लागल्याने इतर माश्यांच्या प्रजाति धोक्यात तर आल्याच आहेत.शिवाय मच्छिमारांच्या जाळ्याचे अतोनात नुकसान होऊ लागल्याने मच्छिमार संकटात सापडला आहे.

मुळात तर या माश्याची ओळख फिश टॅंकमधील मासा म्हणून होती.मात्र फिश टॅंक मध्ये अनेक शोभिवंत माश्यांनी प्रवेश केल्यानंतर व पाळणारांची हौस फिटल्यानंतर हा मासा खाडीत,नदी सोडून देण्यास सुरुवात झाली. हा मासा मुळता अमेरिकेतला असल्याचे अभ्यासक सांगतात, आता मुंबई खाडीत व  वाराणसीच्या गंगा नदीत  हा मासा आढळून आला होता तेंव्हापासुनच मत्स्य अभ्यासकांनी धोक्याची सूचना दिली होती.मात्र या धोकेदायक माश्याने आता राज्यातील सर्वात मोठे उजनी पाणलोट क्षेत्र व्यापून टाकले आहे.

याबाबत मत्स्य अभ्यासक भरत मल्लाव यांना विचारले असता ते म्हणाले की,असे धोकादायक आणि घातक माशे उजनी धरणात मोठ्या प्रमाणावर वाढत आहेत त्यामुळे मत्स्य विभागाच्या संबंधित अधिकाऱ्यांनी, मंत्र्यांनी यावरती तात्काळ बैठक घेऊन उजनीतील मांगुर व सकर मासा कसा नष्ट करायचा यावरती उपाययोजना करणे गरजेचे आहे अन्यथा उजनीत मांगुर अन सकर या उपद्रवी व घातक माशा शिवाय इतर कोणताही मासा सापडणार नाही हे नक्कीच..!