नवमतदार नोंदणीकरीता युवकांनी प्रयत्न करावेत- प्रांताधिकारी दादासाहेब कांबळे

नवमतदार नोंदणीकरीता युवकांनी प्रयत्न करावेत- प्रांताधिकारी दादासाहेब कांबळे

आज पार पडलेल्या कार्यक्रमामध्ये नवमतदार विद्यार्थ्‍यांना मतदान ओळखपत्राचे वितरण करण्यात आले.

बारामती वार्तापत्र 

भारतातील लोकशाही बळकट करताना युवकांनी मतदानाचा पवित्र हक्क बजावून तसेच याबाबत नागरीकांमध्ये जनजागृतीचे कार्य करुन महत्वाचे योगदान द्यायला हवे, असे आवाहन प्रांताधिकारी दादासाहेब कांबळे यांनी केले.

राष्ट्रीय मतदार दिनानिमित्त तहसिल कार्यालय, बारामती येथे आज प्रांताधिकारी दादासाहेब कांबळे यांच्या अध्यक्षतेखाली राष्ट्रीय मतदार दिवस साजरा करण्यात आला. यावेळी सहा.नोंदणी अधिकारी तथा तहसिलदार विजय पाटील, निवडणूक नायब तहसिलदार पी.डी.शिंदे, नायब तहसिलदार संजय गांधी योजना श्री.भोसले, तहसिल कार्यालयातील सर्व कर्मचारी आणि विद्यार्थी उपस्थित होते.

भारतीय लोकशाही बळकट व सक्षम होण्यासाठी तरुणांनी पुढाकार घेणे गरजेचे आहे.लोकशाही बळकट करण्याचे काम मतदार नोंदणीतून आणि मतदानामध्ये सक्रीय सहभागातून होत असल्याने युवकांनी यात पुढाकार घ्यावा, त्याकरीता वयाची 18 वर्षे पूर्ण केलेल्या प्रत्येक पात्रताधारक भारतीय नागरिकाला मतदानाचा पवित्र हक्क बजावता यावा, यासाठी निवडणूक विभागामार्फत प्रचार, प्रसार व मतदार नोंदणी अभियान राबविण्यात येत आहे, असे प्रांताधिकारी दादासाहेब कांबळे यांनी सांगितले.

निवडणूक आायोगाचा 25 जानेवारी हा स्थापना दिवस आहे. हा दिवस देशभरामध्ये राष्ट्रीय मतदार दिवस म्हणून साजरा करण्यात येतो. मतदारामंध्ये मतदाना विषयी जनजागृती व्हावी, नवीन मतदार नोंदणी व्हावी या उद्देशाने या दिवशी वेगवेगळया कार्यक्रमांचे आयोजन करण्यात येते. मतदानासारख्या पवित्र कर्तव्यापासून कोणी वंचित राहू नये, असेही ते यावेळी म्‍हणाले.

आज पार पडलेल्या कार्यक्रमामध्ये नवमतदार विद्यार्थ्‍यांना मतदान ओळखपत्राचे वितरण करण्यात आले.