60 वर्षांवरील ज्येष्ठ नागरिकांना कोरोनाचा तिसरा डोस, दहा जानेवारीपासून सुरुवात होणार;आरोग्यमंत्री राजेश टोपे

60 वर्षांवरील ज्येष्ठ नागरिकांना कोरोनाचा तिसरा डोस, दहा जानेवारीपासून सुरुवात होणार;आरोग्यमंत्री राजेश टोपे

कोरोनाला आळा घालायचा असेल तर लसीकरण हाच एकमेव पर्याय आहे.

प्रतिनिधी

60 वर्षांवरील ज्येष्ठ नागरिकांना कोरोनाचा तिसरा डोस देण्यात येणार आहे. कोरोनाच्या बूस्टर डोसची तयारी अंतिम टप्प्यात असून, येत्या दहा जानेवारीपासून बूस्टर डोसला सुरुवात होणार असल्याची माहिती आरोग्यमंत्री राजेश टोपे यांनी दिली आहे. ज्यांनी पूर्वी दोनही डोस हे कोविशिल्डचे घेतले आहेत, त्यांना कोविशिल्डचा तर ज्यांनी कोवॅक्सिनचे घेतले आहेत त्यांना कोवॅक्सिनचा डोस देण्यात येणार असल्याचे टोपे यांनी सांगितले.

राज्यात लसीचा तुटवडा

पुढे बोलताना टोपे म्हणाले की, कोरोनाला आळा घालायचा असेल तर लसीकरण हाच एकमेव पर्याय आहे. त्यामुळे आता ज्येष्ठ नागरिकांना कोरोना लसीचा बूस्टर डोस देण्याचा निर्णय घेण्यात आला आहे, सोबतच राज्यात सध्या 15 ते 18 वयोगटातील मुलांचे देखील लसीकरण सुरू आहे. मोठ्याप्रमाणात लसीकरण सुरू असल्याने सध्या राज्यात लसीचा तुटवडा जाणवत आहे. कोविशिल्डच्या साठ लाख तर कोव्हॅक्सिनच्या 40 लाख लसी कमी पडत आहेत. राज्याला अतिरिक्त लसींचा पुरवठा करण्यात यावा अशी मागणी आम्ही केंद्राकडे केल्याची माहिती देखील यावेळी टोपे यांनी दिली.