शेतकरी आंदोलनातील नेत्यांना लुकआऊट नोटीस जारी,, नियोजित वेळेचे बंधन पाळले नाही व इतर कारणांसाठी नोटीस जारी

शेतकरी आंदोलनातील नेत्यांना लुकआऊट नोटीस जारी,, नियोजित वेळेचे बंधन पाळले नाही व इतर कारणांसाठी नोटीस जारी

दिल्ली पोलिसांकडून या प्रकरणात अनेक एफआयआर दाखल करण्यात आल्या आहेत

दिल्ली ; बारामती वार्तापत्र रिपोर्ट
प्रजासत्ताक दिनी झालेल्या हिंसाचार प्रकरणात दिल्ली पोलिसांनी कारवाईला सुरुवात केलीय. या प्रकरणात दिल्ली पोलिसांकडून शेतकरी नेत्यांना कारणे दाखवा नोटीस जारी करण्यात आली आहे तसंच त्यांचे पासपोर्ट जप्त केले जाणार आहेत.

दिल्ली पोलिसांकडून शेतकरी नेत्यांचे पासपोर्ट जप्त करण्याची कारवाईही सुरू केली जाणार आहे. या अगोदर दिल्ली पोलिसांकडून २० हून अधिक शेतकरी नेत्यांना कारणे दाखवा नोटीस बजावण्यात आली आहे. ‘शेतकरी नेत्यांचं दिल्ली पोलिसांसोबत झालेला करार का तोडण्यात आला? शेतकरी नेत्यांनी ट्रॅक्टर मार्चमध्ये सर्वात पुढे असणं गरजेचं होतं. तसंच आंदोलनात केवळ ५००० ट्रॅक्टरला परवानगी देण्यात आली होती. ट्रॅक्टर मार्चची वेळ दुपारी १२.०० वाजताची निश्चित करण्यात आली होती. परंतु त्यापूर्वीच ट्रॅक्टर मार्चला सुरूवात करण्यात आली. काही असामाजिक घटकांनी मंचावर कब्जा करून भडकाऊ भाषणंही दिली’ असं म्हणत यासाठी जबाबदार धरून शेतकरी नेत्यांवर कारवाई का केली जाऊ नये अशी विचारणा करत दिल्ली पोलिसांनी नोटीस जारी केले आहे.

अनेक शेतकरी नेत्यांनी ही नोटीस मिळाली. यामध्ये योगेंद्र यादव, बलबीर राजेवाल, बलदेव सिंह सिरसा, डॉ. दर्शनपाल या शेतकरी नेत्यांचाही समावेश आहे. या नोटिशीला उत्तर देण्यासाठी पोलिसांनी नेत्यांना तीन दिवसांचा अवधी दिला आहे. संरक्षित वास्तू असलेल्या लाल किल्ल्याजवळ झालेला हिंसाचार ‘सर्वात निंदनीय आणि राष्ट्रविरोधी कृत्य’ असल्याचं पोलिसांनी म्हटलंय.

दिल्ली पोलिसांकडून या प्रकरणात अनेक एफआयआर दाखल करण्यात आल्या आहेत. यामध्ये दीप सिद्धू तसंच ‘माजी गँगस्टर’ आणि सद्य सामाजिक कार्यकर्ता बनलेल्या लक्खा सिधाना यांच्या नावाचाही समावेश आहे. भारतीय दंड संहिता (IPC) सार्वजनिक मालमत्तेला नुकसान पोहचवणं तसंच अन्य कायद्यांनुसार हा गुन्हा दाखल करण्यात आला आहे. पुरातन स्मारकं आणि ऐतिहासिक स्थळं तसंच अवशेष कायदा, शस्त्रास्त्र कायद्यानुसारही गुन्हे दाखल करण्यात आले आहेत.

सरीकडे सिंघु, टिकरी, गाझीपूर या दिल्लीच्या सीमांवर कृषी कायद्याविरोधात शेतकऱ्यांचे आंदोलन सुरुच आहे. आंदोलनकर्त्यांची संख्या कमी झाली असली तरी आंदोलक आपल्या निश्चयावर ठाम आहेत. याच दरम्यान पश्चिम उत्तर प्रदेशच्या बागपतमध्ये राष्ट्रीय महामार्गावर आंदोलनकर्त्यांवर बुधवारी रात्री उशिरा उत्तर प्रदेश पोलिसांनी कारवाई केलीय.

नॅशनल हायवे अथॉरिटी’च्या एका नोटिशीचा हवाला देत पोलिसांनी आंदोलनकर्त्यांना इथून हटवलंय. ही कारवाई बळानं नाही तर शांतिपूर्ण पद्धतीन करण्यात आल्याचं उत्तर प्रदेश पोलिसांनी म्हटलंय.

केंद्रीय गृहमंत्री अमित शहा गुरुवारी सुश्रुत ट्रॉमा सेंटर आणि तीर्थ राम रुग्णालय या दोन रुग्णालयांना भेट देणार आहेत. या दरम्यान ते दिल्ली हिंसाचारात जखमी झालेल्या पोलीस कर्मचाऱ्यांची भेट घेणार आहेत. ट्रॅक्टर रॅली दरम्यान वेगवेगळ्या ठिकाणी जवळपास ३०० पोलीस कर्मचारी जखमी झाल्याचं दिल्ली पोलिसांकडून सांगण्यात आलं होतं.