बारामतीत स्टंटबाजी पडली महागात; दोघांना पोलिसांनी शिकवला धडा, गुन्हा दाखल

बारामतीत स्टंटबाजी पडली महागात; दोघांना पोलिसांनी शिकवला धडा, गुन्हा दाखल

एक टाटा पंच तर दुसरी पोलो गाडी

बारामती वार्तापत्र

बारामती शहरातील एमआयडीसी परिसरात बेफाम चालवलेल्या दोन ‘स्टंट कारच्या’ व्हायरल व्हिडीओने बारामतीकरांचा अक्षरशः थरकाप उडाला. हे व्हिडीओ थेट वाहतूक शाखेचे पोलिस निरीक्षक चंद्रशेखर यादव यांच्यापर्यंत पोहोचले, मग काय?

या वाहनांचा वाहतूक पोलिसांच्या मदतीने शोध घेत अखेर या स्टंटबाजांना बारामती पोलिसांनी चांगलाच धडा शिकवला आहे.

याप्रकरणी पोलिसांनी मयूर आव्हाड आणि तेजस मनोज कांबळे या स्टंटबाजांविरोधात बेदरकारपणे वाहन चालविल्याचा गुन्हा दाखल करण्यात आला आहे.

याबाबत सविस्तर माहिती अशी की, बारामती एमआयडीसीतील पेन्सिल चौक ते गदिमा चौक या रहदारीच्या रस्त्यावर दोन चारचाकी वाहनांनी स्टंटबाजी करून स्वतःच्या आणि इतरांच्या जीवितास धोका निर्माण केल्याचा व्हिडीओ सोशल मीडियावर व्हायरल झाला होता.

त्यामध्ये एक टाटा पंच तर दुसरी पोलो गाडी असल्याचे दिसत होते. हा स्टंट जर चालकाच्या अंगलट आला असता तर यात अनेकांना जीवही गमवावा लागला असता. वाहतूकीच्या दृष्टीने बारामती शहर सुरक्षित करण्यासाठी वाहतुक पोलिसांनी आत्तापर्यंत अनेक उपक्रम राबवून, दंड आकारून, दोरीचे प्रयोग करून, प्रसंगी वाहन चालक आणि नागरीकांचे प्रबोधन करून उत्तम आणि प्रामाणिक काम केले आहे. मात्र या व्हिडीओने बारामतीकरांना धक्काच बसला. व्हायरल व्हिडीओत वाहनांचे नंबर अस्पष्ट दिसत असल्याने वाहतूक शाखेसाठी हे मोठे आव्हान होते. मात्र वाहतूक शाखेने या वाहनांपर्यंत पोहोचण्यासाठी प्रयत्न करत अखेर त्या वाहनांचा शोध घेतला. त्यातील एक चारचाकी दौंड तालुक्यातील असल्याचे निष्पन्न झाले. हा गुन्हा दि. २५ जानेवारी रोजी घडला असल्याचे सिद्ध झाले.

पोलीस अधीक्षक पंकज देशमुख, अपर पोलीस अधीक्षक गणेश बिरादार, उपविभागीय पोलीस अधिकारी सुदर्शन राठोड यांच्या मार्गदर्शनाखाली वाहतूक शाखेचे पोलीस निरीक्षक चंद्रशेखर यादव, बारामती तालुका पोलीस ठाण्याच्या पोलीस निरीक्षक वैशाली पाटील, वाहतूक पोलीस अंमलदार सुभाष काळे, सुधाकर जाधव, अजिंक्य कदम, योगेश कातवारे, हवालदार रावसाहेब गायकवाड, ओंकार सिताप यांनी ही कारवाई केली.

वाहतूक पोलिसांनी लावला वाहनांचा शोध

व्हायरल व्हिडीओत वाहनांचे क्रमांक अस्पष्ट दिसत असल्याने वाहतूक शाखेसाठी हे मोठे आव्हान होते. मात्र, वाहतूक शाखेने त्या वाहनांचा शोध घेतला. त्यातील एक चारचाकी दौंड तालुक्यातील असून, हा गुन्हा दि. 25 जानेवारी रोजी घडल्याचे सिद्ध झाले, तर दि. 27 रोजी टाटा पंच तसेच फोक्सवॅगन कंपनीची पोलो गाडी या वाहनचालकांवर बारामती पोलीस ठाण्यात गुन्हा दाखल करण्यात आला. मयूर आव्हाड आणि तेजस कांबळे अशी या दोघांची नावे आहेत.

नागरिकांनी तात्काळ गुन्ह्यांची माहिती कळवा

बारामतीला वाहतुक कोंडीपासून सुरक्षित करण्यासाठी आणि वाहतुक नियमांची अंमलबजावणी करण्यासाठी वाहतूक शाखा प्रयत्न करत आहे. मात्र असे असतानाही काही स्टंटबाज, टुकार वाहनचालक नियमांची पायमल्ली करून शांतता आणि सुरक्षिततेला धोका निर्माण करतात. मात्र असे प्रसंग आढळून आल्यास नागरिकांनी न घाबरता वाहतुक पोलिसांना कळवावे. तक्रारदाराचे नाव गुपित ठेऊ.
– चंद्रशेखर यादव