अजितदादांच्या निधनानंतर बारामतीत मटका व्यवसायाचा सुळसुळाट; प्रशासनाच्या भूमिकेवर प्रश्नचिन्ह

अजितदादांच्या निधनानंतर बारामतीत मटका व्यवसायाचा सुळसुळाट; प्रशासनाच्या भूमिकेवर प्रश्नचिन्ह

आर्थिक फसवणूक, गुन्हेगारी आणि सामाजिक समस्या वाढण्याची शक्यता

बारामती वार्तापत्र 

बारामती शहरात अलीकडच्या काळात बेकायदेशीर मटका व्यवसायाने पुन्हा डोके वर काढल्याचे चित्र दिसत आहे. विशेषतः काही भागांमध्ये उघडपणे मटका चालवला जात असल्याच्या तक्रारी स्थानिकांकडून होत आहेत.

त्यामुळे कायदा व सुव्यवस्थेचा प्रश्न निर्माण होत असून, प्रशासनाच्या कार्यक्षमतेवरही प्रश्नचिन्ह उपस्थित केले जात आहे.

मिळालेल्या माहितीनुसार, काही सोसायट्यांमध्ये आणि गल्लोगल्ली मटक्याच्या छोट्या-छोट्या शाखा सुरू झाल्या आहेत. स्थानिकांच्या म्हणण्यानुसार, हा व्यवसाय उघडपणे सुरू असूनही त्यावर ठोस कारवाई होताना दिसत नाही. यामुळे नागरिकांमध्ये नाराजीचे वातावरण आहे.

दरम्यान, काही नागरिकांनी असेही सांगितले की, पूर्वी अशा प्रकारच्या बेकायदेशीर धंद्यांवर नियंत्रण होते; मात्र सध्या परिस्थिती बदलल्याचे जाणवत आहे.

विशेषतः तरुण पिढी या जुगाराच्या विळख्यात अडकण्याची भीती व्यक्त केली जात आहे.

मटका हा पूर्णपणे बेकायदेशीर प्रकार असून, त्यातून आर्थिक फसवणूक, गुन्हेगारी आणि सामाजिक समस्या वाढण्याची शक्यता असते.

त्यामुळे अशा व्यवसायांवर तातडीने कारवाई करणे गरजेचे असल्याचे मत जाणकार व्यक्त करत आहेत.
नागरिकांनी पोलिस प्रशासनाकडे या प्रकरणी तातडीने लक्ष घालून संबंधितांवर कठोर कारवाई करण्याची मागणी केली आहे. तसेच शहरात पुन्हा कायद्याचा धाक निर्माण करण्याची गरज व्यक्त केली जात आहे.

एकूणच, बारामतीसारख्या शांत शहरात वाढत चाललेल्या मटका व्यवसायामुळे चिंतेचे वातावरण निर्माण झाले असून, यावर वेळीच नियंत्रण न ठेवल्यास परिस्थिती गंभीर होऊ शकते.