अपघात टाळण्यासाठी नियमांचे पालन करा : भालेराव

हेल्मेट व सीट बेल्ट याचा वापर वाहनधारकांनी करावा..

इंदापूर प्रतिनिधी –

“वाहन चालवताना मोबाईलवर न बोलणे यासह इतर वाहतूक नियमांचे तंतोतंत पालन केल्यास संभाव्य अपघाताचा धोका टळेल. यामधून जीवित, वित्तहानी होणार नाही. यामुळे वाहतूक नियमांचे पालन करणे गरजेचे आहे,” असे प्रतिपादन मोटार वाहन निरीक्षक पद्माकर भालेकर यांनी केले.

इंदापूरात विद्या प्रतिष्ठान पॉलिटेक्निक कॉलेज येथे रस्ता सुरक्षा अभियानाविषयी जनजागृती व्हावी म्हणून ‘रस्ता सुरक्षेच्या दृष्टीने आवश्यक असलेल्या वाहतुकीच्या नियमांचे पालन व्हावे तसेच हेल्मेट व सीट बेल्ट याचा वापर वाहनधारकांनी करावा’ याविषयी विद्यार्थ्यांमध्ये जनजागृती निर्माण करण्याकरिता स्टुडन्ट मेंटेरिंग सिस्टीमअंतर्गत प्रीसायडिंग ऑफिसर प्रा. राजीव वाघमारे यांनी या कार्यक्रमाचे आयोजन केले होते.

उपप्रादेशिक परिवहन कार्यालय बारामती व विद्या प्रतिष्ठान पॉलिटेक्निक कॉलेज इंदापूर यांच्या संयुक्त विद्यमाने महाविद्यालयातील सभागृहात हा कार्यक्रम आयोजित केला होता. या कार्यक्रमास मोटार वाहन निरीक्षक पद्माकर भालेकर, सहायक मोटर वाहन निरीक्षक तेजस मखरे व रोहित भोसले, इंदापूर येथील पोलिस कॉन्स्टेबल सुहास आरणे, अमोल खाडे, अनिल नागरगोजे हे अधिकारी उपस्थित होते.

या जनजागृतीपर कार्यक्रमामधून गाडी चालवताना वाहतुकीच्या नियमांचे पालन करणे याविषयी माहिती दिली. हा कार्यक्रम यशस्वी होण्याकरिता बारामती येथील उपप्रादेशिक परिवहन अधिकारी सुरेंद्र निकम व महाविद्यालयाचे प्राचार्य डॉ. सुजय देशपांडे यांचे मार्गदर्शन लाभले. सूत्रसंचालन प्रा. सोनाली काळे यांनी केले.