कोल्हापुरात भीषण अपघात. एक कार थेट दरीत, एकाचा होरपळून मृत्यू

कोल्हापुरात भीषण अपघात. एक कार थेट दरीत, एकाचा होरपळून मृत्यू

आग लागल्याने कार संपूर्णपणे जळून खाक झाली आहे.

प्रतिनिधी

कोल्हापूर जिल्ह्यातील कागल ते मुरगूड रस्त्यावर हा अपघात झाला आहे. अपघातानंतर गाडी थेट दरीत कोसळली. या अपघातात कारने पेट घेतला आणि यामध्ये एका व्यक्तीचा होरपळून मृत्यू झाला आहे. हा अपघात नेमका कसा झाला याबाबत अद्याप माहिती मिळू शकलेली नाहीये.

मिळालेल्या प्राथमिक माहितीनुसार, कागल – मुरगूड रस्त्यावर वाघजाई घाडात हा अपघात झाला आहे. सकाळी धावत्या कारमध्ये एक स्फोट झाला आणि त्यानंतर ही गाडी थेट दोनशे मीटर दरीत जाऊन कोसळली असं बोललं जात आहे. यामुळे कारने पेट घेतला आणि एका व्यक्तीचा मृत्यू झाला आहे.

आग लागल्याने कार संपूर्णपणे जळून खाक झाली आहे. कारच्या शेजारी एका व्यक्तीचा जळालेल्या अवस्थेत मृतदेह आढळून आला आहे. हा मृतक व्यक्ती कोण आहे याबाबत आता पोलीस अधिक तपास करत आहेत. होरपळून मृत्यू झाल्याने मृतकाची ओळख पटवण्यास अडचणीत येत आहेत.

शुक्रवारी सकाळी सहा वाजण्याच्या सुमारास ही दुर्घटना झाली असल्याचं बोललं जात आहे. कार दरीत कोसळल्यानंतर जोरदार स्फोटाचा आवाज झाला असंही स्थानिक नागरिकांनी सांगितल्याचं कळतंय. या घटनेची माहिती मिळताच पोलीस घटनास्थळी दाखल झाले. मृतकाचे शवविच्छेदन करण्यासाठी रुग्णालयात पाठवण्यात आले असून पोलिसांनी गुन्हा दाखल करत तपास सुरू केला आहे.

दरम्यान, चालत्या कारमध्ये स्फोट झाल्यानंतर हा अपघात झाला आहे की, कार दरीत कोसळून स्फोट झाला याबाबत अद्याप स्पष्टता नाहीये.