पक्ष ताब्याच्या हालचालींवरून खळबळ; सुनेत्रा पवारांनी पटेल-तटकरेंचा डाव उधळला? रोहित पवारानी केला आरोप

पक्ष ताब्याच्या हालचालींवरून खळबळ; सुनेत्रा पवारांनी पटेल-तटकरेंचा डाव उधळला? रोहित पवारानी केला आरोप

पत्रामुळेच पक्षातील अंतर्गत राजकारण उघडकीस

बारामती वार्तापत्र

राष्ट्रवादी काँग्रेसच्या दोन्ही गटांमधील संघर्ष पुन्हा एकदा उफाळून आला असून, पक्ष ताब्यात घेण्याच्या हालचालींवरून मोठा राजकीय वाद निर्माण झाला आहे. राष्ट्रवादी काँग्रेस (शरदचंद्र पवार) गटाचे आमदार रोहित पवार यांनी घेतलेल्या पत्रकार परिषदेमुळे या वादाला अधिकच धार आली आहे.

रोहित पवार यांनी आरोप केला की, राष्ट्रवादी काँग्रेसच्या अजित पवार गटातील नेते प्रफुल्ल पटेल आणि सुनील तटकरे यांनी पक्षावर नियंत्रण मिळवण्यासाठी पडद्यामागे हालचाली सुरू केल्या होत्या. या संदर्भात निवडणूक आयोगाला पत्र पाठवण्यात आले होते, असा गंभीर दावा त्यांनी केला.

या पत्रामुळेच पक्षातील अंतर्गत राजकारण उघडकीस आले असून, त्यातून मोठी खळबळ उडाली आहे.
याच पार्श्वभूमीवर सुनेत्रा पवार यांची भूमिकाही चर्चेत आली आहे. सूत्रांच्या माहितीनुसार, त्यांनी संबंधित घडामोडींवर वेळीच पावले उचलत कथित डाव उधळून लावल्याचे सांगितले जात आहे. त्यामुळे पटेल आणि तटकरे यांच्या प्रयत्नांना अडथळा निर्माण झाल्याचे बोलले जात आहे.

रोहित पवार यांनी पत्रकार परिषदेत केंद्रीय मंत्री पीयूष गोयल यांच्या विधानाचाही संदर्भ देत अप्रत्यक्षपणे पटेल आणि तटकरे यांच्यावर निशाणा साधला. त्यांनी म्हटले की, काही नेते सत्तेसाठी कोणत्याही पातळीवर जाण्यास तयार आहेत, आणि याचाच भाग म्हणून पक्ष ताब्यात घेण्याचा प्रयत्न झाला.

दरम्यान, या सर्व आरोपांमुळे राष्ट्रवादी काँग्रेसच्या दोन्ही गटांमध्ये आरोप-प्रत्यारोपांचे राजकारण पुन्हा पेटण्याची चिन्हे दिसत आहेत. अजित पवार गटाकडून या आरोपांना काय उत्तर दिले जाते, याकडे आता सर्वांचे लक्ष लागले आहे.

एकूणच, या पत्रामुळे आणि आरोपांमुळे राष्ट्रवादी काँग्रेसमधील अंतर्गत संघर्ष पुन्हा एकदा चव्हाट्यावर आला असून, आगामी काळात या प्रकरणाचे राजकीय परिणाम काय होतील, याबाबत उत्सुकता वाढली आहे.