बारामतीत जागतिक दर्जाचे ‘कृषिक’ प्रदर्शन १६ पासून: राजेंद्र पवार

बारामतीत जागतिक दर्जाचे ‘कृषिक’ प्रदर्शन १६ पासून: राजेंद्र पवार

उद्योजकांना कृषी क्रांतीची नवीन दिशा मिळणार

बारामती वार्तापत्र

जगविख्यात संस्थांच्या सहकार्य़ाने अॅग्रीकल्चरल डेव्हलपमेंट ट्रस्ट बारामतीमध्ये `कृषिक २०२५` सारखे विविध उपक्रम राबववित आहे.

बुधवारी (ता. १५) या प्रदर्शनाचे उद्‌घाटन होणार असून, गुरुवार (ता. १६) ते सोमवार (ता. २० जानेवारी) या कालावधीत हे प्रदर्शन सर्वांसाठी खुले असणार असल्याची माहिती अॅग्रिकल्चरल डेव्हलपमेंट ट्रस्टचे प्रमुख राजेंद्र पवार यांनी दिली.
ज्येष्ठ नेते व ट्रस्टचे अध्यक्ष शरद पवार यांच्या अध्यक्षतेखाली होणाऱ्या या कार्यक्रमाला उपमुख्यमंत्री अजित पवार, कृषिमंत्री माणिकराव कोकाटे, पशुसंवर्धनमंत्री पंकजा मुंडे, क्रीडामंत्री दत्तात्रेय भरणे उपस्थित राहणार आहेत.

पवार म्हणाले, ”कृत्रिम बुद्धिमत्ता (एआय) तंत्रज्ञानाचा वापर ऊस पिकात अधिक प्रभावीपणे करणे व त्या अनुषंगाने कमी खर्चात अधिक उत्पन्न घेण्याची प्रक्रिया माहिती करून घेण्यासाठी यंदाचे कृषिक प्रदर्शन महत्त्वपूर्ण ठरणार आहे.

कृत्रिम बुद्धिमत्तेच्या वापरातून शेतकऱ्यांना समृद्ध करण्यासाठी ऑक्सफर्ड विद्यापीठ, मायक्रोसॉफ्ट कंपनी, अॅग्रिकल्चरल डेव्हलपमेंट ट्रस्ट आदी संस्था एकत्र आलेल्या आहेत.

आमचे संशोधन, तंत्र व संकल्पना प्रत्यक्षात कसे कार्य करतात, हे या कृषी प्रदर्शनात सर्वांना बघण्यास मिळणार आहे. कृषिक प्रदर्शनातून बहुसंख्य शेतकरी, शास्त्रज्ञ, अधिकारी आणि उद्योजकांना कृषी क्रांतीची नवीन दिशा मिळणार आहे. यावेळी ट्रस्टचे सीईओ नीलेश नलावडे उपस्थित होते.

कृषिक प्रदर्शनात यंदाचे मुख्य आकर्षण
देशात पहिल्या फार्म ऑफ द फ्युचरची उभारणी, कृत्रिम बुद्धिमत्तेच्या आधारे वाढवलेला ऊस, नावीन्यपूर्ण फळझाडांची लागवड, परदेशी कटफ्लॉवरची प्रात्यक्षिके, शेवंतीच्या २९ प्रकारची फूलशेती, काळा टोमॅटोसह २९ प्रकारच्या टोमॅटोचे देशी वाण, काळी मिरची व मिरचीची विविध प्रात्यक्षिके, जिरायती शेतीसाठी ज्वारीचे विविध वाण व तुर्की बाजरी, कापसाची नवीन तंत्रज्ञानावर आधारित लागवड व काढणी प्रात्यक्षिके, स्वतंत्र पशुदालन, भरडधान्य पहावयास मिळणार आहे. तसेच नेदरलॅंड, चीन, अमेरिका, इस्राईल, ब्राझिल, स्पेन, इटली, आफ्रिका, फ्रान्स, थायलंड, कोरिया, जपान, इंग्लंड, ऑस्टेलिया आदी देशांतील विविध एआय-सेन्सर व रोबोटिक तंत्रज्ञान पाहण्याची शेतकऱ्यांना प्रदर्शनात संधी मिळणार आहे.