बारामतीत जैन मंदीर पाडल्याच्या निषेधार्थ मोर्चा व बंद
उत्स्फूर्तपणे व्यवहार बंद
बारामती वार्तापत्र
मुंबईतील विलेपार्ले येथील दिगंबर जैन समाजाचे मंदीर व जिनमूर्तीची मुंबई महानगरपालिकेच्या अधिका-यांनी बुलडोझर चालवून मंदीर जमीनदोस्त करत जिनमूर्ती व जिनशास्त्राची अवहेलना केली गेली. या घटनेच्या निषेधार्थ बारामतीत गुरुवारी (ता. 24) निषेध मोर्चाचे आयोजन केले गेले. बारामतीकरांनी उत्स्फूर्तपणे व्यवहार बंद ठेवून या मोर्चाचे समर्थन केले.
गुरुवारी सकाळी महावीर पथ येथील श्री मुनिसुव्रतनाथ दिगंबर जैन मंदीरापासून निषेध मोर्चास प्रारंभ झाला. या मध्य सकल जैन समाज तसेच सर्वधर्मिय बांधव मोठया संख्येने सहभागी झाले होते. गांधी चौक, सुभाष चौक, भिगवण चौकातून इंदापूर चौक मार्गे निषेध मोर्चा प्रशासकीय भवन येथे गेला.
बारामतीचे तहसिलदार गणेश शिंदे यांना या प्रसंगी सकल जैन धर्मियांच्या वतीने निवेदन दिले गेले. किशोरकुमार शहा, मनोज मुथा व दिलीप धोका यांच्या या निवेदनावर सहया आहेत. माजी नगराध्यक्ष जवाहर वाघोलीकर, मंगल सराफ, भारती मुथा, माजी उपनगराध्यक्ष संजय संघवी यांच्यासह अँड. संदीप गुजर, सुशील सोमाणी, सुनिल शिंदे, अक्षय देवकाते, रवींद्र चव्हाण, सुरेंद्र जेवरे, काळूराम चौधरी, आसिफ खान, साधू बल्लाळ, शुभम अहिवळे, श्रीकांत जाधव, रमेश मोरे, जगदीश पंजाबी यांच्यासह अनेक जैन बांधव मोठ्या संख्येने उपस्थित होते.
या आहेत जैन समाजाच्या शासनाकडे केलेल्या मागण्या…..
• विलेपार्ले येथील जैन मंदिरावर हल्ला करणा-या व धर्माची विटंबना करणा-या सर्व संबंधित दोषी अधिका-यांवर कडक कारवाई करुन त्यांना निलंबित करावे.
• मंदिर पूर्व स्थितीत जसे होते तसे पुन्हा त्याच जागेवर बांधून त्याचे पुननिर्माण करुन ते जैनवासियांना सुपूर्द करावे.
• समाजाच्या शुचितेसाठी कडक नियम करावे जेणेकरुन पुन्हा इतरांनी जैन समाजाकडे गैर नजरेने पाहू नये व गैरवर्तन करु नये
• जैन धर्मस्थळांची व साधूंची सुरक्षा सुनिश्चित करण्यात यावी व यासाठी संबंधित अधिका-यांना सूचित करावे.
• जैन समाजाच्या अल्पसंख्यांक कायद्यानुसार त्यांचा सन्मान राखला जावा.
