बेकिंग न्यूज | वरुडेत एकाच वेळी पाच घरफोड्या! शिक्रापूर पोलिसांच्या जाळ्यात एक आरोपी; दोन साथीदार फरार!

बेकिंग न्यूज | वरुडेत एकाच वेळी पाच घरफोड्या! शिक्रापूर पोलिसांच्या जाळ्यात एक आरोपी; दोन साथीदार फरार!

शिक्रापूर पोलिसांची धडाकेबाज कामगिरी; ६० हजारांचा मुद्देमाल लंपास करणाऱ्या टोळीतील एकाला अटक, दोन साथीदार फरार!

शिक्रापूर | दि. १६ ऑक्टोबर

शिरूर तालुक्यातील वरुडे येथे एकाच वेळी पाच घरांमध्ये घरफोड्या करून सोन्या-चांदीचे दागिने आणि रोख रक्कम लंपास करणाऱ्या टोळीतील एका आरोपीला जेरबंद करण्यात शिक्रापूर पोलिसांना यश आले आहे. अनिल निदान भोसले (वय ४४, रा. थोरला मळा, मोराची चिंचोली, ता. शिरूर, जि. पुणे) असे अटक करण्यात आलेल्या आरोपीचे नाव आहे. या घरफोडी प्रकरणात त्याचे दोन साथीदार अद्याप फरार असून, त्यांचा शोध घेण्यासाठी पोलिसांनी तपासाची चक्रे वेगाने फिरवली आहेत.

पाच घरांना लक्ष्य; ६० हजारांचा मुद्देमाल लंपास

शिक्रापूर पोलीस ठाण्याच्या हद्दीतील वरुडे येथे चोरट्यांनी एकाच वेळी पाच घरांमध्ये घरफोडी करत परिसरात खळबळ उडवली होती. या चोरीमध्ये सोन्या-चांदीचे दागिने आणि रोख रक्कम असा अंदाजे ६० हजार रुपयांचा मुद्देमाल चोरट्यांनी लंपास केला होता.

या प्रकरणी विठ्ठल दत्तात्रय डांगे (वय ३७) यांच्या फिर्यादीवरून शिक्रापूर पोलीस ठाण्यात भारतीय न्याय संहितेच्या कलम ३०५ (अ) आणि ३३१ (४) नुसार अज्ञात आरोपींविरुद्ध गुन्हा दाखल करण्यात आला होता.

तांत्रिक तपासातून आरोपीचा माग काढला

एकाच वेळी पाच घरांमध्ये झालेल्या घरफोड्यांचे गांभीर्य लक्षात घेऊन शिक्रापूर पोलीस ठाण्याचे पोलीस निरीक्षक चंद्रशेखर यादव यांनी आरोपींचा शोध घेऊन गुन्हा उघडकीस आणण्याच्या सूचना तपास पथकाला दिल्या.

त्यानुसार पोलिसांनी तांत्रिक विश्लेषण आणि गोपनीय माहितीच्या आधारे तपास सुरू केला. तपासादरम्यान मिळालेल्या गोपनीय माहितीच्या आधारे अनिल भोसले याला ताब्यात घेण्यात आले. चौकशीदरम्यान त्याने दोन साथीदारांच्या मदतीने घरफोडी केल्याची कबुली दिल्याची माहिती पोलिसांनी दिली. त्यानंतर त्याला अटक करण्यात आली.

दोन साथीदार फरार; आणखी गुन्हे उघड होण्याची शक्यता

या प्रकरणात एका आरोपीला अटक झाली असली, तरी त्याचे दोन साथीदार अद्याप पोलिसांच्या हाती लागलेले नाहीत. त्यांचा शोध घेण्यासाठी पोलिसांकडून प्रयत्न सुरू आहेत. अटक करण्यात आलेल्या आरोपीने यापूर्वी अशाच प्रकारचे आणखी गुन्हे केले आहेत का, याचाही तपास केला जात आहे.

त्यामुळे या टोळीच्या अन्य गुन्ह्यांचा उलगडा होण्याची शक्यता पोलिसांनी व्यक्त केली आहे. फरार साथीदारांना अटक झाल्यानंतर या घरफोडी प्रकरणातील अधिक माहिती समोर येण्याची अपेक्षा आहे.

वरिष्ठांच्या मार्गदर्शनाखाली पोलिसांची कारवाई

पुणे ग्रामीणचे पोलीस अधीक्षक संदिपसिंह गिल्ल, अपर पोलीस अधीक्षक डॉ. शुभम कुमार आणि शिरूरचे उपविभागीय पोलीस अधिकारी रविंद्र भोसले यांच्या मार्गदर्शनाखाली ही कारवाई करण्यात आली.

या कारवाईत पोलीस निरीक्षक चंद्रशेखर यादव, पोलीस उपनिरीक्षक उमाकांत कुंजीर, पोलीस हवालदार रोहिदास पारखे, अमोल दांडगे, शिवाजी चितारे, विश्वंभर वाघमारे, संदिप बनकर तसेच पोलीस अंमलदार नारायण वाळके, राम जाधव, मच्छिंद्र निचीत, नागेश वाघमारे आणि भारत भोसले यांच्या पथकाने सहभाग घेतला.

या प्रकरणाचा पुढील तपास पोलीस हवालदार संदिप बनकर करीत आहेत.

वरुडेतील पाच घरफोड्यांमधील एका आरोपीला अटक झाल्याने तपासाला महत्त्वाचे वळण मिळाले असून, फरार साथीदारांचा शोध आणि संभाव्य अन्य गुन्ह्यांची उकल याकडे आता सर्वांचे लक्ष लागले आहे.