भाजप नेते रावसाहेब दानवे यांनी केलेल्या अक्षेपार्ह वक्तव्याच्या निषेधार्थ इंदापूरात नाभिक समाजाचा मोर्चा

भाजप नेते रावसाहेब दानवे यांनी केलेल्या अक्षेपार्ह वक्तव्याच्या निषेधार्थ इंदापूरात नाभिक समाजाचा मोर्चा

नाभिक समाजाकडून तीव्र शब्दात रोष व्यक्त ; राजीनाम्याची केली मागणी

इंदापूर : प्रतिनिधी

राज्यातील महाविकास आघाडी सरकारवर टीका करत असताना भाजप नेते तथा केंद्रीय राज्यमंत्री रावसाहेब दानवे यांनी नाभिक समाजाबद्दल अपमानजनक वक्तव्य केल्याचा निषेधार्थ सोमवारी (दि.१४) समस्त नाभिक समाजाच्या वतीने दानवेंचा निषेध करून इंदापूर प्रशासकीय भवनावर मोर्चा काढण्यात आला.यावेळी तहसीलदार श्रीकांत पाटील यांना निवेदन देण्यात आले.

पुणे जिल्हा नाभिक महामंडळाचे अध्यक्ष रमेश राऊत यावेळी बोलताना म्हणाले की, दानवे यांनी जे अक्षेपार्ह वक्तव्य केले ते निंदनीय आहे. त्यामुळे संपूर्ण भारतातील नाभिक समाजाचा अपमान झालेला आहे. त्यामुळे सर्व नाभिक समाज पेटून उठून रस्त्यावर उतरलेला आहे. दानवे यांनी ‘त्या’ वक्तव्याबद्दल जाहीर माफी मागावी अन्यथा जालना येथील त्यांच्या निवासस्थानासमोर येणाऱ्या २१ तारखेला सर्व नाभिक समाज एकत्र येऊन त्याठिकाणी मुंडण आंदोलन करुन केस त्यांना दान करणार आहे,आणि तरी देखील त्यांनी माफी नाही मागितली तर मात्र महाराष्ट्रासह देशात तीव्र स्वरुपाचे आंदोलन करण्यात येईल.

प्रसंगी बोलताना बहुजन मुक्ती पार्टीचे राष्ट्रीय महासचिव ॲड.राहुल मखरे म्हणाले की,या जातीवादी मानसिकतेच्या लोकांना उघडे पाडून सर्व बहुजन समाजाने एकत्र आले पाहिजे. जातीवादी भूमिकेच्या विरोधामध्ये मी कायम समाजाच्या बरोबर आहे.

इंदापूर शहर नाभिक संघटनेचे अध्यक्ष संतोष क्षीरसागर याप्रसंगी म्हणाले की,केंद्रात भाजपची सत्ता असल्याने त्यांना माज आहे. या अगोदर देखील दानवे यांनी शेतकऱ्यांविषयी बोलताना साले म्हणून उल्लेख केला होता.ते नेहमी भावना दुखवतील अशी वक्तव्य करत असतात त्यामुळे त्यांनी राजीनामा द्यावा.

यावेळी महाराष्ट्र नाभिक महामंडळाचे इंदापूर तालुकाध्यक्ष अवधूत पवार, तालुक्याचे युवक अध्यक्ष पंकज सूर्यवंशी, उपाध्यक्ष वैभव सुर्यवंशी, कालिदास राऊत, राजेंद्र क्षीरसागर,माऊली जगताप, आनंद जाधव, राजेंद्र राऊत, राहुल काळे, शंकर काशीद,संतोष जगताप, दादा शिंदे,राजेंद्र शिंदे आदींसह शेकडोंच्या संख्येने नाभिक बांधव उपस्थित होते.