‘मेफेंटरमाइन सल्फेट’ इंजेक्शन्सची बेकायदेशीर विक्री करणाऱ्या तरुणाला बारामती अटक, ९० व्हाईल्स जप्त

प्रकरणातील दुसरा साथीदार राहुल उघडे हा फरार आहे.

बारामती वार्तापत्र 

शरीरसौष्ठवासाठी मेफेनटरमाइन सल्फेट या इंजेक्शनची बेकायदा विक्री करण्यात आल्याचा प्रकार उघडकीस आला आहे.

बारामतीतील भिगवण रस्त्यावरील इलाईट जिम जवळ ‘क्रेटा’ गाडीतील दोघा जणांना पकडले. त्यांच्याकडून’मेंफेटरमाईन'(MEPHENTERMINE) या इंजेक्शनच्या ९० बाटल्या पोलिसांनी ताब्यात घेतल्या आणि तन्मय कल्याण बनकर याला पोलिसांनी अटक केली आहे.

तर या प्रकरणातील दुसरा साथीदार राहुल उघडे हा फरार आहे.

गेल्या अनेक महिन्यांपासून बारामती मध्ये ‘मेंफेटरमाईन’ ही इंजेक्शन्स विकली जात असल्याबद्दल चर्चा होती. ही इंजेक्शन्स जिममध्ये व्यायाम करणारी मुलं घेत आहेत. तसेच त्याची एक साखळी तयार झाली असून, ही इंजेक्शन्स अव्वाच्या सवा दाराने विकली जात असल्याची चर्चा होती. मात्र आता तब्बल ९० इंजेक्शन्स एकाच गाडीतून पोलिसांनी ताब्यात घेतल्याने या इंजेक्शनचे रॅकेट समोर आले आहे.

या संदर्भात पोलीस सूत्राने दिलेली माहिती अशी, ३ जून रोजी बारामती शहर पोलीस ठाण्याच्या हद्दीत पोलीस गस्त घालत असताना बारामती भिगवण रस्त्यावरील इलाईट जिम जवळ ‘क्रेटा’ गाडी क्रमांक (एम एच १४ जे.ए ०९०१ ) यामध्ये दोघे जण बसलेले दिसले. पोलिसांनी त्यांची चौकशी केली असता, गाडीतून उतरून एक जण पळून गेला तेव्हा पोलिसांनी दुसऱ्याला ताब्यात घेतले. त्याच्याकडून गाडीची झडती घेतली तेव्हा गाडीच्या डिक्की मध्ये ‘मेंफेटरमाईन’ सल्फेटची ९० इंजेक्शन्स मिळाली.

याप्रकरणी गुन्हे प्रकटीकरण पथकातील जितेंद्र महादेव शिंदे यांनी बारामती शहर पोलीस ठाण्यात फिर्याद दिली. त्यावरून तन्मय कल्याण बनकरला अटक करण्यात आले असून, राहुल उबाळे हा फरार आहे. या संदर्भात अन्न आणि औषध विभागाचे औषध निरीक्षक सचिन बुगड यांनी बारामती शहर पोलीस ठाण्यास भेट देत या इंजेक्शनची पाहणी केली. ही इंजेक्शन शरीर सौष्ठव करण्यासाठी आणि व्यसन म्हणून वापरले जात असल्याचे सांगितले.

ही कारवाई पोलीस अधीक्षक संदीप सिंग गिल, अपर पोलीस अधीक्षक गणेश बिरादार, उपविभागीय पोलीस अधिकारी सुदर्शन राठोड, पोलीस निरीक्षक विलास नाळे यांच्या मार्गदर्शनाखाली गुन्हे प्रकटीकरण शाखेतील फौजदार सतीश राऊत, रत्नदीप भंडारे, अमीर शेख, अभिजीत कांबळे, रामचंद्र शिंदे, सुलतान डांगे, जितेंद्र शिंदे, अक्षय सीताफ, सागर जामदार, दत्तात्रय मदने व अमोल देवकाते यांच्या पथकाने केली.