लोणी देवकर – चांडगाव रोडवर अज्ञात वाहनाच्या धडकेत कोल्ह्याचा मृत्यू

लोणी देवकर – चांडगाव रोडवर अज्ञात वाहनाच्या धडकेत कोल्ह्याचा मृत्यू

कोल्ह्याच्या मृत्यूमुळे स्थानिकांमध्ये वन्यजीव सुरक्षिततेबाबत चिंता व्यक्त केली जात आहे.

इंदापूर; प्रतिनिधी

इंदापूर तालुक्यातील लोणी देवकर – चांडगाव रोडवर दत्तनगर ( जगताप वस्ती ) जवळ एका अज्ञात वाहनाच्या धडकेत एका कोल्ह्याचा दुर्दैवी मृत्यू झाला. ही घटना बुधवारी पहाटेच्या सुमारास घडली असून, यामुळे परिसरात हळहळ व्यक्त होत आहे.

स्थानिक रहिवासी आणि प्रत्यक्षदर्शींनी दिलेल्या माहितीनुसार, बुधवारी पहाटेच्या वेळी एक कोल्हा लोणी देवकर-चांडगाव रोड ओलांडण्याचा प्रयत्न करत होता. याचवेळी भरधाव वेगाने आलेल्या एका अज्ञात वाहनाने त्याला जोरदार धडक दिली. धडकेची तीव्रता इतकी होती की, कोल्हा गंभीर जखमी होऊन रस्त्यावरच गतप्राण झाला. या घटनेची माहिती सकाळी उघडकीस आल्यानंतर जगताप वस्तीमधील नागरिकांनी घटनास्थळी धाव घेतली.

कोल्ह्याच्या मृत्यूमुळे स्थानिकांमध्ये वन्यजीव सुरक्षिततेबाबत चिंता व्यक्त केली जात आहे. गेल्या काही महिन्यांपासून या भागात वन्य प्राण्यांचा वावर वाढला आहे. रात्रीच्या वेळी कोल्हे आणि इतर प्राणी रस्त्यावर येण्याचे प्रमाण वाढले आहे. यामुळे, वाहन चालकांनी अधिक काळजी घेणे आवश्यक आहे, असे नागरिकांचे म्हणणे आहे.

या घटनेनंतर, मृत कोल्ह्याला बाजूला काढण्यात आले. वन्यजीवप्रेमींनी या घटनेची नोंद घेऊन प्रशासनाने तातडीने उपाययोजना कराव्यात, अशी मागणी केली आहे. रस्त्यांवर वन्यप्राण्यांसाठी सूचना फलक लावणे आणि रात्रीच्या वेळी वेग मर्यादा निश्चित करणे यांसारख्या उपाययोजनांची गरज असल्याचे मत काही पर्यावरणवाद्यांनी व्यक्त केले आहे.