विश्रामगृहाताल वीज प्रश्नावरून मंत्री छगन भुजबळ भडकले
वीज पुरवठा वारंवार खंडित
इंदापूर;प्रतिनिधि
राज्याचे अन्न व नागरी पुरवठामंत्री छगन भुजबळ यांना इंदापूर शहरातील शासकीय विश्रामगृहावर वारंवार होणाऱ्या वीज खंडित प्रकारामुळे चांगलाच मनस्ताप सहन करावा लागला. या प्रकरणी त्यांनी अधिकाऱ्यांना चांगलेच धारेवर धरले.
दरम्यान, या प्रकरणामुळे किमान यापुढे तरी इंदापूर सार्वजनिक बांधकाम विभाग यांच्या कारभारात सुधारणा होईल अशी अपेक्षा व्यक्त केली जात आहे. याबाबत अधिक माहिती अशी की पुण्याहून सोलापूर जिल्ह्यातील अरण येथील एका कार्यक्रमासाठी जात असताना मंत्री भुजबळ हे इंदापूर येथील शासकीय विश्रामगृहावर थांबले. मात्र, याचवेळी वीज पुरवठा वारंवार खंडित झाल्याने त्यांनी सार्वजनिक बांधकाम विभाग
अधिकाऱ्यांना चांगलेच धारेवर धरले आणि कामकाजात सुधारणा करण्याची सूचना केली.
इंदापूर शहर व तालुक्यात सार्वजनिक बांधकाम विभागाच्या माध्यमातून विविध विकास कामे करण्यात आली. मात्र, इंदापूर न्यायालयाच्या इमारतीबाबत उपमुख्यमंत्री यांनी दर्शवलेली नाराजी, शहरातील चौक सुशोभीकरणाच्या कामाबाबत तक्रारी, तालुक्यातील विविध रस्त्यांच्या कामाचे दर्जे याबरोबर आता शासकीय विश्रामगृहातील नियोजनाचा अभाव यामुळे सार्वजनिक बांधकाम विभागाचा नियोजन शून्य कारभार चव्हाट्यावर आला आहे. तालुक्याचे नेतृत्व करणारे क्रीडामंत्री दत्तात्रेय भरणे यांनी याप्रकरणी लक्ष घालण्याची गरज नागरिकांकडून व्यक्त होत आहे.
