शरद पवारांवर आक्षेपार्ह कविता पडलं महागात,भाजप प्रवक्ते विनायक आंबेकर यांना राष्ट्रवादीच्या कार्यकर्त्यांकडून चोप

शरद पवारांवर आक्षेपार्ह कविता पडलं महागात,भाजप प्रवक्ते विनायक आंबेकर यांना राष्ट्रवादीच्या कार्यकर्त्यांकडून चोप

भाजपकडून नेमकी काय प्रतिक्रिया येते हे पाहणं महत्त्वाचं ठरणार आहे.

पुणे,प्रतिनिधी

भाजपचे प्रवक्ते विनायक आंबेकर यांना राष्ट्रवादी काँग्रेसच्या कार्यकर्त्यांकडून मारहाण करण्यात आल्याचा हा व्हिडीओ आहे..पुण्यातील त्यांचा कार्यालयात घुसून ही मारहाण करण्यात आलीय. दोन दिवसांपूर्वीच विनायक आंबेकर यांनी शरद पवारांविरोधात आक्षेपार्ह पोस्ट केली होती. त्याचाच राग मनात धरुन राष्ट्रवादीच्या कार्यकर्त्यांनी हा प्रकार केलाय. राष्ट्रवादीच्या कार्यकर्त्यांनी विनायक आंबेकर यांच्याविरोधात यापूर्वी तक्रारही दिली होती… पण यानंतर मारहाणही करण्यात आल्याने भाजप विरुद्ध राष्ट्रवादी हा वाद पुण्यात चिघळणार आहे.

केतकी चितळे हिने फेसबुकवर एक कविता शेअर करत शरद पवारांवर खालच्या पातळीवर टीका केली होती. विशेष म्हणजे तिच्याआधी भाजपचे प्रवक्ते विनायक आंबेकर यांनीदेखील फेसबुकवर शरद पवारांवर टोकाची टीका केली होती. केतकी चितळेच्या टीकेचं प्रकरण गाजलं असताना राष्ट्रवादी काँग्रेसच्या कार्यकर्त्यांनी आज विनायक आंबेकर यांना मारहाण केली.

राष्ट्रवादी काँग्रेसचे कार्यकर्ते आज विनायक आंबेकर यांच्या कार्यालयात गेले होते. त्यांनी तिथे आंबेकर यांना त्यांच्या फेसबुक पोस्टबाबत जाब विचारला. यावेळी आंबेकर आपली भूमिका मांडत होते. पण आक्रमक झालेल्या राष्ट्रवादीच्या कार्यकर्त्यांनी आंबेकर यांना मारहाण केली. या घटनेचा व्हिडीओदेखील समोर आला आहे. आंबेकर यांना मारहाण केल्याचा व्हिडीओ आता सोशल मीडियावरही शेअर केला जातोय. आंबेकर यांना करण्यात आलेल्या मारहाणीवर आता भाजपकडून नेमकी काय प्रतिक्रिया येते हे पाहणं महत्त्वाचं ठरणार आहे.