शिखर शिंगणापूर यात्रेला प्रारंभ; कावड उभारणीसह ग्रामप्रदक्षिणेला उत्स्फूर्त प्रतिसाद बारामती वार्तापत्र 

शिखर शिंगणापूर यात्रेला प्रारंभ; कावड उभारणीसह ग्रामप्रदक्षिणेला उत्स्फूर्त प्रतिसाद

कावडी सोहळ्याला धार्मिक आणि सांस्कृतिक महत्त्व

बारामती वार्तापत्र 

सातारा जिल्ह्यातील शिखर शिंगणापूर येथे असलेल्या श्री शंभू महादेवाच्या वार्षिक यात्रेला आजपासून उत्साहात प्रारंभ झाला आहे. दरवर्षीप्रमाणे यंदाही भाविकांमध्ये प्रचंड उत्साह दिसून येत असून, यात्रेचे मुख्य आकर्षण मानली जाणारी कावड उभारणी विविध ठिकाणी करण्यात येत आहे.

बारामती तालुक्यातील झारगडवाडी आणि डोर्लेवाडी येथे पारंपरिक पद्धतीने कावडी उभारण्यात आल्या. यानंतर ढोल-ताशे आणि इतर पारंपरिक वाद्यांच्या गजरात ग्रामप्रदक्षिणा काढण्यात आली. या सोहळ्यात ग्रामस्थांसह तरुणाई आणि भाविक मोठ्या संख्येने सहभागी झाले होते.

शिखर शिंगणापूर यात्रेचे आणखी एक महत्त्वाचे वैशिष्ट्य म्हणजे मुंगी घाट सोहळा. हा घाट चढणे अत्यंत कठीण मानला जातो. तरीही श्रद्धेने भारलेले लाखो भाविक हा अवघड घाट पार करून शिखर शिंगणापूर येथे दाखल होतात.

या अद्वितीय परंपरेचे दर्शन घेण्यासाठीही मोठ्या संख्येने लोक उपस्थित राहतात.

कावडी सोहळ्याला धार्मिक आणि सांस्कृतिक महत्त्व असून, या कावडीच्या हंड्यात विविध नद्यांचे पवित्र जल भरले जाते. हे जल शिखर शिंगणापूर येथे नेऊन श्री शंभू महादेवाच्या पिंडीवर अभिषेक करण्याची परंपरा पिढ्यान्पिढ्या सुरू आहे.

यात्रेच्या निमित्ताने परिसरात भक्तिमय वातावरण निर्माण झाले असून, प्रशासनाकडूनही आवश्यक ती तयारी करण्यात आली आहे. श्रद्धा, परंपरा आणि उत्साह यांचा संगम असलेली ही यात्रा भाविकांसाठी विशेष आकर्षण ठरत आहे.