सुशांत प्रकरणात सीबीआयनं काय दिवे लावले ते पाहिले; शरद पवारांचा टोला

सुशांत प्रकरणात सीबीआयनं काय दिवे लावले ते पाहिले; शरद पवारांचा टोला

सर्वोच्च न्यायालयानं सीबीआयच्या हाती तपास देऊन जवळपास दीड महिना होत आला आहे.

मुंबई: बारामती वार्तापत्र

सुशांतसिंह राजपूतनं आत्नहत्या केली की त्याची हत्या झाली, हे कोडं सोडवण्यात अद्यापही सीबीआयला यश आलं नाहीये. यांसंदर्भात अलीकडेच सीबीआयनं एक निवेदन प्रसिद्ध केलं आहे. सीबीआयनं दिलेल्या या माहितीच्या आधारे राष्ट्रवादी काँग्रेसचे अध्यक्ष शरद पवार यांनी सीबीआयच्या तपासावर प्रश्नचिन्ह उपस्थित केले आहेत.

सुशांतसिंह आत्महत्या प्रकरणात मुंबई पोलिस व ठाकरे सरकारच्या भूमिकेबाबत विरोधकांकडून अनेक प्रश्न उपस्थित करण्यात येत होते. राज्यातील युवा मंत्र्यांचा यात हात असून त्यासाठीच मुंबई पोलिसांचं या प्रकरणाकडे दुर्लक्ष करत आहे, असे आरोप होत होते. त्यानंतर, अखेर सुशांतसिंह प्रकरणाचा तपास सर्वोच्च न्यायालयाच्या आदेशानुसार सीबीआयकडे सोपवण्यात आला. जवळपास दीड महिना होत आला तरी हाती काहीच ठोस पुरावे आले नाहीत. सीबीआयनं यासंदर्भात एक अधिकृत निवेदन जारी केलंय. ‘सुशांत प्रकरणात सीबीआय अद्याप कुठल्याही निष्कर्षापर्यंत पोहोचलेली नाही. सर्व बाजूंनी या प्रकरणाचा तपास सुरू आहे,’ असं सीबीआयनं म्हटलं आहे. यावरूनच शरद पवार यांनी सीबीआयवर सडकून टीका केली आहे.

‘सुशांतसिंह राजपूत मृत्यू प्रकरणाचा तपास करण्यासाठी वेगळी यंत्रणा नेमली आहे. तिनं काय दिवे लावले ते पाहिले,’ अशा शब्दांत शरद पवारांनी सीबीआयला टोला लगावला आहे. मुंबई पोलीस याचा तपास करत होते, मात्र केंद्राला ते पसंत नव्हते म्हणून त्यांनी सीबीआयकडे तपास सोपवला. पण या प्रकरणात आत्महत्येचा विषय बाजूलाच राहिला असून लक्ष वळवण्यासाठी इतरच गोष्टींचा तपास सुरु केल्याने सत्य बाहेर येईल का हाच प्रश्न आहे, असंही शरद पवार म्हणाले आहेत.

रम्यान, अनिल देशमु यांनीही सीबीआयच्या तपासाबाबत प्रश्न उपस्थित केले आहेत. ‘सुशांतसिंह प्रकरणाचा तपास मुंबई पोलिस प्रोफेशनल पद्धतीने हाताळत होते. त्यानंतर हा तपास सीबीआयकडे सोपवण्यात आला. सीबीआय तपासाचा निकाल काय यासाठी आम्ही उत्सुक आहोत. सुशांतनं आत्महत्या केली की त्याची हत्या झाली?,’ असे प्रश्न जनतेच्या मनात आहेत, असं ते म्हणाले.