बारामतीतील भगिनी मंडळाच्या अध्यक्षपदी ज्योती किरण इंगळे यांची निवड

बारामतीतील भगिनी मंडळाच्या अध्यक्षपदी ज्योती किरण इंगळे यांची निवड

महिलांच्या शिक्षण, आरोग्य, रोजगार व कौशल्यविकासावर अधिक भर

बारामती वार्तापत्र 

शहरातील महिलांच्या सक्षमीकरणासाठी कार्यरत असलेल्या आणि सामाजिक-सांस्कृतिक क्षेत्रात भरीव योगदान देणाऱ्या ‘भगिनी मंडळा’च्या अध्यक्षपदी सौ. ज्योती किरण इंगळे यांची नुकतीच निवड करण्यात आली आहे.

या निवडीमुळे संस्थेच्या कार्याला नवसंजीवनी मिळणार असल्याची भावना व्यक्त होत आहे.
बारामतीतील भगिनी मंडळ ही महिलांच्या सर्वांगीण विकासासाठी कार्य करणारी एक जुनी व प्रतिष्ठित संस्था म्हणून ओळखली जाते. महिलांच्या कलागुणांना वाव देणे, स्वावलंबनासाठी प्रोत्साहन देणे, तसेच विविध सामाजिक उपक्रमांच्या माध्यमातून महिलांमध्ये जागरूकता निर्माण करणे, अशा अनेक उपक्रमांमुळे या संस्थेने आपली वेगळी ओळख निर्माण केली आहे.

नुकतीच भगिनी मंडळाच्या सभागृहात वार्षिक सर्वसाधारण सभा पार पडली. या सभेत नवीन पदाधिकाऱ्यांची निवड करण्यात आली. सर्व सदस्यांच्या एकमताने सौ. ज्योती किरण इंगळे यांची अध्यक्षपदी निवड करण्यात आली. त्यांच्या निवडीचे सर्व स्तरांतून स्वागत करण्यात येत आहे.

ज्योती इंगळे या यापूर्वीही विविध सामाजिक उपक्रमांमध्ये सक्रिय राहिल्या असून महिलांच्या प्रश्नांबाबत त्यांना विशेष आस्था आहे. त्यांच्या नेतृत्वाखाली भगिनी मंडळ अधिक प्रभावीपणे कार्य करेल, महिलांसाठी नवे उपक्रम राबवले जातील आणि संस्थेची परंपरा अधिक बळकट होईल, असा विश्वास सदस्यांनी व्यक्त केला.

यावेळी सभेत संस्थेच्या गतवर्षातील कामकाजाचा आढावा घेण्यात आला तसेच आगामी वर्षासाठी विविध उपक्रमांची रूपरेषा ठरविण्यात आली. महिलांच्या शिक्षण, आरोग्य, रोजगार व कौशल्यविकासावर अधिक भर देण्याचा निर्धारही यावेळी व्यक्त करण्यात आला.