मराठी चित्रपटातील ‘दे दणादण”आवडाक्का’ काळाच्या पडद्याआड,अभिनेत्री प्रेमा किरण यांचं निधन

मराठी चित्रपटातील ‘दे दणादण”आवडाक्का’ काळाच्या पडद्याआड,अभिनेत्री प्रेमा किरण यांचं निधन

साकारलेल्या भूमिका प्रेक्षकांच्या आजही लक्षात

प्रतिनिधी

मराठी चित्रपटसृष्टीतून रविवारी सकाळी एक दु:खद बातमी समोर आली आहे. प्रसिद्ध मराठी सिनेमा अभिनेत्री प्रेमा किरण यांचे मुंबईत निधन झालं. हृदयविकाराच्या झटक्याने वयाच्या 61 व्या वर्षी त्यांनी अखेरचा श्वास घेतला. प्रेमा किरण यांच्या निधनामुळे मराठी चित्रपटसृष्टीला मोठा धक्का बसला आहे. ‘धुमधडाका’, ‘इरसाल कारटी’, ‘पागलपन’ , ‘अर्जुन देवा’, ‘कुंकू झाले वैरी’ आणि ‘लग्नाची वरात लंडनच्या घरात’ या सिनेमांमध्ये त्यांनी मुख्य भूमिका बजावली.

काही दिवसांपूर्वीच त्यांनी झी मराठीवर नुकतंच प्रेक्षकांच्या भेटीस आलेला ‘हे तर काहीच नाय’ या कार्यक्रमात हजेरी लावली होती. त्यावेळी त्यांनी दे देणादण चित्रपटातील गंमतीशीर किस्से सांगितले होते.

त्यांनी नारायण देऊळगावकर यांनी दिग्दर्शित आणि महेश कोठारे यांची निर्मिती असलेला दे दणादण या चित्रपटाविषयी गप्पा मारल्या. त्यावेळी प्रेमा यांनी मजेशीर गमती जमती सांगत ‘मी पडले म्हणून दे दणादण हा चित्रपट हिट झाला’ असे वक्तव्य केले होते.

प्रेमा किरण हा किस्सा सांगताना म्हणाल्या, ‘पोलीस वाल्या सायकल वाल्या’ या गाण्याच्या शूटिंगवेळी महेश कोठारे यांनी आम्हाला दुपारच्या आत हे गाणं संपवायचं, अशी ताकीद दिली होती. त्यानंतर या गाण्याचं शूटिंग देखील सुरु झालं.

मात्र, शूटिंग सुरू असताना लक्ष्मीकांत बेर्डे यांना सायकल नीट चालवता येत नव्हती. अवघी दोन दोन पावलं पुढे जाऊन लक्ष्मीकांत बेर्डे यांनी प्रेमा यांना खाली पाडलं. या चित्रपटाध्ये प्रेमा किरण या सायकलीवरून चक्क तीन वेळा पडल्या होत्या. चित्रपटाचा हा किस्सा सांगताना त्या गमतीने म्हणाल्या, ‘मी तीनवेळा पडले म्हणून सिनेमा हिट झाला’, हे ऐकताच प्रेक्षकांमध्ये एकच हशा पिकला होता. त्यांचा हा किस्सा सोशल मीडियावर चांगलाच चर्चेत होता.

निधनानंतर त्यांचे अनेक चाहते सोशल मीडियाच्या माध्यमातून श्रद्धांजली वाहिली आहे. लक्ष्मीकांत बेर्डे यांच्यासोबत प्रेमा यांच्या जोडीला चाहत्यांनी डोक्यावर घेतलं. एवढंच नाही, तर ‘दे दणादण’, ‘धुमधडाका’ सिनेमातील त्यांच्या गाण्यांना देखील प्रेक्षकांची चांगलीच पसंती मिळाली होती.