विमानचालू असताना पायलटच्या सीटवर मालक झोपला जय पवारांनी शेअर केला व्हिडीओ केली अटकेची मागणी

विमानचालू असताना पायलटच्या सीटवर मालक झोपला जय पवारांनी शेअर केला व्हिडीओ केली अटकेची मागणी

मी डीजीसीएकडे ठामपणे मागणी करतो की, या प्रकरणात तात्काळ कठोर कारवाई व्हावी.

बारामती वार्तापत्र 

राष्ट्रवादी काँग्रेसचे नेते आणि राज्याचे माजी उपमुख्यमंत्री अजित पवार यांच्या निधनाला महिना उलटत नाही तोच, त्यांचे पुत्र जय पवार यांनी या अपघातासंदर्भात अत्यंत धक्कादायक खुलासा केला आहे.

ज्या VSR कंपनीच्या विमानात अजित पवारांचा अंत झाला, त्या कंपनीचा मालक रोहित सिंह हे उड्डाणादरम्यान पायलटच्या सीटवर झोपलेले असल्याचा एक व्हिडिओ जय पवार यांनी सोशल मीडियावर शेअर केला आहे. अशा प्रकारचा गंभीर निष्काळजीपणा करणाऱ्या कंपनीवर आणि त्यांच्या मालकावर कारवाई करण्याची मागणी जय पवार यांनी केली आहे.

जय पवारांची DGCA कडे मागणी

जय पवार यांनी अत्यंत भावूक पोस्ट लिहिली आहे. जय पवार यांनी शेअर केलेल्या व्हिडिओमध्ये, व्हीएसआर कंपनीचे मालक रोहित सिंह हे मुख्य पायलटच्या सीटवर बसलेले असून उड्डाण सुरू असताना ते चक्क झोपलेले दिसत आहेत.

“माझ्या वडिलांना आपण गमावले ही वेदना आयुष्यभर साथ देणार आहे. या व्हिडिओमध्ये व्हीएसआरचे मालक रोहित सिंह मुख्य पायलटच्या सीटवर उड्डाणादरम्यान झोपलेले दिसत आहेत. आकाशात असताना असा निष्काळजीपणा असू शकत नाही. हे अत्यंत गंभीर आणि धक्कादायक आहे. मी डीजीसीएकडे ठामपणे मागणी करतो की, या प्रकरणात तात्काळ कठोर कारवाई व्हावी. संपूर्ण चौकशी होईपर्यंत व्हीएसआरची सर्व विमाने तात्काळ ग्राउंड करण्यात यावीत आणि रोहित सिंह यांना त्वरित अटक करून कठोर कायदेशीर कारवाई करण्यात यावी. ही एका मुलाची आर्त हाक आहे… माझ्या वडिलांसाठी आणि प्रत्येक प्रवाशाच्या सुरक्षिततेसाठी,” असं जय पवार यांनी पोस्टमध्ये म्हटलं.

रोहित पवारांचा सातत्यपूर्ण पाठपुरावा

आमदार रोहित पवार यांनी या दुर्घटनेनंतर पहिल्या दिवसापासून आक्रमक पवित्रा घेतला आहे. त्यांनी सातत्याने या कंपनीच्या कार्यपद्धतीवर प्रश्नचिन्ह उपस्थित केले असून, दोषींवर मनुष्यवधाचा गुन्हा दाखल करण्याची मागणी लावून धरली होती. जय पवारांच्या ताज्या आरोपांनंतर रोहित पवारांच्या भूमिकेला अधिक बळ मिळाले आहे.