मोरगांव येथील मयुरेश्वराचा शाही दसरा उत्सव रद्द
बारामती तालुक्यातील मोरगाव येथे मयुरेश्वराचा विजयादशमी सोहळा संपुर्ण राज्यात प्रसिद्ध आहे .
मोरगांव येथील मयुरेश्वराचा शाही दसरा उत्सव रद्द
बारामती तालुक्यातील मोरगाव येथे मयुरेश्वराचा विजयादशमी सोहळा संपुर्ण राज्यात प्रसिद्ध आहे .
बारामती वार्तापत्र
मोरगाव : अष्टविनायक तीर्थक्षेत्र मोरगाव ता. बारामती येथील शेकडो वर्षाची परंपरा असलेला विजयादशमीचा सोहळा रद्द करण्याचे मोरगांव येथील समस्त ग्रामस्थ व मानकऱ्यांनी ठरवले आहे. येथील दसऱ्याची शेकडो वर्षांची परंपरा आहे .मात्र कोरोना या विषाणूजन्य आजारामुळे श्रींचा सीमोल्लंघन सोहळा न काढण्याचा निर्णय ग्रामस्थ व मानकऱ्यांनी घेतला असल्याची माहीती सरपंच निलेश केदारी यांनी दिली
बारामती तालुक्यातील मोरगाव येथे मयुरेश्वराचा विजयादशमी सोहळा संपुर्ण राज्यात प्रसिद्ध आहे . हा सोहळा पाहण्यासाठी राज्यासह परराज्यातुन भावीक येतात . हा उत्सव शेकडो वर्षापासून मोठ्या उत्साहात साजरा केला जातो . उत्सवाच्या निमित्ताने संपुर्ण ग्राम प्रदक्षिणा व ग्रामदैवतांच्या भेटीस हा सोहळा पालखी , अबदागिरी , छत्री , सनई चौघड्याचा मंगलमई सुर , शोभेच्या फटाक्यांची आतषबाजी करीत मार्गक्रमण करीत असतो.
पालखी समोर तोफांची सलामी दिली जाते . दशमुखी रावणाचे दहण ,व मोरया मोरयाचा जयघोष करण्यासाठी हजारोंच्या संख्येने गणेश भक्त बाजार तळावर एकत्र येतात . ग्रामप्रदक्षणा करीत असताना फिरंगाई माता गोंधळ , हरमळीचा खेळ , महादेव व गंगेची आरती , वंशावळ वाचन केले जाते . शिवकालात वाघु अण्णा वाघ हे सरदार पानसे यांकडे सेवेला असताना त्यांकडे तोफखान्याची जबाबदारी होती . यावेळी तोफा मयुरेश्वराला अर्पण केल्या होत्या. पैकी आजही पाच तोफा अस्तित्वात आहेत .
श्रींच्या पालखी पुढे या तोफा उडवल्या जातात. मात्र कोरोना या विषाणूजन्य आजारामुळे हा सोहळा रद्द करण्याचे ग्रामस्थांनी ठरवले आहे . सोहळ्यास परवानकी मिळणेबाबत शासन दरबारी वेळोवेळी पाठपुरावा करुनही परवानकी न मिळाल्याने गावातील सर्व आजी माजी पदाधिकारी , ग्रामजोशी ,पुजारी यांनी बैठक घेऊन सोहळा रद्द करुन प्रशासनास मदत करण्याचे ठरवले आहे .विजयादशमी सोहळा रद्द झाला असल्याने दसऱ्या दिवशी भक्तांनी न येण्याचे आवाहन करण्यात येत आहे .
