सलून व्यावसायिकांच्या मागण्यासाठी पाठपुरावा करणार- हर्षवर्धन पाटील.

सलून व्यावसायिकांच्या मागण्यासाठी पाठपुरावा करणार- हर्षवर्धन पाटील
इंदापूर तालुका नाभिक समाजाच्या संघटनेच्यावतीने आपल्या विविध मागण्यासाठी महाराष्ट्र राज्याचे माजी संसदीय व सहकारमंत्री हर्षवर्धन पाटील यांना निवेदन दिले यावेळी उपस्थितांशी संवाद साधताना त्यांनी सलून व्यवसायिकांच्या मागण्यासाठी महाराष्ट्र शासन आणि केंद्र सरकारकडे त्यांच्या न्याय्य हक्कासाठी पाठपुरावा करणार असल्याचे सांगितले.
हर्षवर्धन पाटील म्हणाले की,’ ज्याप्रमाणे लॉकडाऊन नंतर अनेक उद्योग व्यवसाय सुरू करण्यास परवानगी मिळाली. त्याचप्रमाणे शासनाच्या नियमाच्या अधीन राहून या सलून व्यवसायिकांना देखील परवानगी मिळावी. दिल्ली, कर्नाटक, तामिळनाडू राज्यांच्या धर्तीवर आधारित दरमहा 10 हजार रुपयांची आर्थिक मदत मिळावी. सलून व्यवसायिकांचे शासनामार्फत आकारण्यात येणारे करभाडे माफ करण्यात यावे. नाभिक समाजाच्या मुलांची शैक्षणिक फी माफ करावी.सलून व्यवसायिक कारागीर व मालकास अत्यावश्यक अन्नधान्य किट उपलब्ध करून द्यावे. सलून व्यवसाय दुकानाचे वीजबिल माफ करण्यात यावे. कोरोना पादुर्भाव झाल्यास शासनामार्फत 50 लाख रुपयांचे विमा संरक्षण मिळावे. या मागण्यासाठी मुख्यमंत्री उद्धव ठाकरे, विरोधी पक्षनेते देवेंद्र फडवणीस तसेच महाराष्ट्राचे प्रभारी नितीन गडकरी, प्रकाश जावडेकर तसेच जिल्हाधिकारी, प्रांत आणि तहसीलदार यांना वरील मागण्यांचे निवेदन देऊन राज्य सरकार आणि केंद्र सरकारकडे पाठपुरावा करणार आहे. देशामध्ये कोरोना पार्श्वभूमीवर पंतप्रधानांनी जे 20 लाख कोटी रुपयांचे पॅकेज जाहीर केले आहे त्यामध्ये नाभिक समाजास देखील लाभ मिळावा यासाठीचा पाठपुरावा करणार आहे.
नाभिक संघटना जिल्हाध्यक्ष रमेश राऊत, तालुकाध्यक्ष अवधूत पवार, शहर अध्यक्ष संतोष क्षीरसागर यांनी यावेळी कोरोना संकटात नाभिक समाजावरती ज्या अनेक समस्या येत आहेत याविषयी आपले मत व्यक्त केले.राज्यमंत्र्याकडे याविषयी पाच वेळा निवेदन दिले असल्याचेही त्यांनी सांगितले.

भाजप तालुकाध्यक्ष नानासाहेब शेंडे, शहराध्यक्ष शकील सय्यद, अशोक शिंदे तसेच नाभिक संघटनेचे पदाधिकारी वैभव सुर्यवंशी, राहुल काळे ,सचिन देवकर ,बजरंग जगताप ,तात्या जगताप ,महावीर यादव, दादा साळुंखे, अमित गवळी, भागवत जाधव, राजेंद्र शिंदे, शंकर काशिद, राजेंद्र क्षीरसागर,भैया क्षीरसागर या वेळी उपस्थित होते.