बारामतीत महिलांच्या वस्तूंना हक्काची बाजारपेठ! जिजाऊ सेवा संघाचा दिवाळी फेस्टिव्हल; ५१ महिलांचा गौरव

बारामतीत महिलांच्या वस्तूंना हक्काची बाजारपेठ! जिजाऊ सेवा संघाचा दिवाळी फेस्टिव्हल; ५१ महिलांचा गौरव

‘देशवासीयांनी बनविलेल्या वस्तू खरेदी करून दिवाळी साजरी करा’; उपविभागीय पोलीस अधिकारी चैतन्य कदम यांचे आवाहन

बारामती वार्तापत्र 

महिला आणि बचतगटांनी तयार केलेल्या वस्तूंना हक्काची बाजारपेठ उपलब्ध करून देणे, त्यांच्या उत्पादनांना प्रोत्साहन देणे आणि महिलांचे आर्थिक सक्षमीकरण साधणे यासाठी जिजाऊ सेवा संघाचे व्यासपीठ महत्त्वपूर्ण ठरत आहे. देशवासीयांनी तयार केलेल्या वस्तूंची खरेदी करून दिवाळी साजरी केल्यास कारागीर आणि वस्तू निर्मात्यांचा उत्साह वाढेल, असे प्रतिपादन उपविभागीय पोलीस अधिकारी चैतन्य कदम यांनी केले.

बारामती तालुका मराठा सेवा संघ प्रणित जिजाऊ सेवा संघाच्या वतीने आयोजित दिवाळी फेस्टिव्हल प्रदर्शनाच्या उद्घाटनप्रसंगी ते बोलत होते. या प्रदर्शनाच्या माध्यमातून महिला उद्योजिका, बचतगट आणि स्थानिक वस्तू निर्मात्यांना आपल्या उत्पादनांच्या विक्रीसाठी हक्काचे व्यासपीठ उपलब्ध झाले आहे.

या प्रसंगी बारामतीचे नगराध्यक्ष सचिन सातव, तहसीलदार स्वप्नील रावडे, गटविकास अधिकारी किशोर माने, नगरसेवक नवनाथ बल्लाळ, प्रवीण माने, अॅड. वृषाल भोसले, पांडुरंग चौधर, जयश्री सातव, छाया कदम, डॉ. सुहासिनी सातव, मराठा सेवा संघाचे प्रदीप शिंदे, बारामती बँकेचे उपाध्यक्ष देवेंद्र शिर्के आदी मान्यवर उपस्थित होते.

महिलांच्या आर्थिक सक्षमीकरणासाठी जिजाऊ सेवा संघाचे कार्य कौतुकास्पद

महिलांनी दिवाळीसाठी तयार केलेल्या वस्तूंना बाजारपेठ उपलब्ध करून देण्याचे काम जिजाऊ सेवा संघाकडून होत आहे. या उपक्रमामुळे महिला आर्थिक नियोजन अधिक सक्षमपणे करू शकत असून, त्यांना स्वावलंबी होण्याची संधी मिळत आहे. जिजाऊ सेवा संघाचे हे कार्य उत्तम आणि कौतुकास्पद असल्याचे नगराध्यक्ष सचिन सातव यांनी सांगितले.

एकाच छताखाली विविध वस्तूंची खरेदी-विक्री

शहरी आणि ग्रामीण भागातील गृहिणी, व्यावसायिक तसेच नोकरी करणाऱ्या महिलांना विविध वस्तूंची खरेदी आणि विक्री सहज करता यावी, यासाठी दिवाळी फेस्टिव्हलचे आयोजन करण्यात आले आहे.

एकाच छताखाली विविध वस्तू सहज उपलब्ध व्हाव्यात, त्यांचा दर्जा आणि गुणवत्ता उत्तम असावी तसेच ग्राहकांना वाजवी दरात वस्तू मिळाव्यात, हा या उपक्रमामागील मुख्य उद्देश असल्याचे जिजाऊ सेवा संघाच्या अध्यक्षा स्वाती ढवाण यांनी सांगितले.

या प्रदर्शनामुळे महिला उद्योजिकांना आपल्या उत्पादनांचे प्रदर्शन करण्याची आणि ग्राहकांपर्यंत थेट पोहोचण्याची संधी मिळाली आहे. महिलांच्या कौशल्याला व्यासपीठ मिळवून देत त्यांना आर्थिकदृष्ट्या सक्षम करण्याचा प्रयत्न या माध्यमातून करण्यात येत आहे.

मतिमंद विद्यार्थ्यांच्या कलाकृतींचा विशेष सन्मान

दिवाळीच्या निमित्ताने मतिमंद विद्यार्थ्यांनी तयार केलेल्या विविध वस्तू आणि कलाकृती विशेष लक्षवेधी ठरल्या. विद्यार्थ्यांनी आपल्या कौशल्यातून तयार केलेल्या दिवाळी वस्तूंचे कौतुक करत त्यांना ‘उत्कृष्ट वस्तू निर्माते’ म्हणून सन्मानित करण्यात आले.

विद्यार्थ्यांच्या कलागुणांना प्रोत्साहन देणारा हा उपक्रम उपस्थितांसाठी विशेष आकर्षण ठरला.

५१ महिलांचा ‘जिजाऊ नारी शक्ती गौरव’ पुरस्काराने सन्मान

बारामती शहर आणि तालुक्यातील घर-संसार, नोकरी तसेच व्यवसाय सांभाळून विविध क्षेत्रांत उल्लेखनीय कार्य करणाऱ्या ५१ महिलांचा ‘जिजाऊ नारी शक्ती गौरव’ पुरस्कार देऊन सन्मान करण्यात आला.

महिलांच्या कर्तृत्वाचा गौरव करत त्यांना सामाजिक कार्यासाठी प्रोत्साहन देण्याच्या उद्देशाने हा सन्मान सोहळा आयोजित करण्यात आला होता.

आयोजनासाठी महिलांचे परिश्रम

कार्यक्रम यशस्वी करण्यासाठी जिजाऊ सेवा संघाच्या मनीषा शिंदे, सुनंदा जगताप, संगीता साळुंखे, कल्पना माने, मनीषा खेडेकर, ऋतुजा नलवडे, गौरी पाटील, पूजा खलाटे, वीणा यादव, सुवर्णा केसकर, वंदना जाधव, अमृता सूर्यवंशी, छाया पाटील, ऐश्वर्या बागल आदी महिलांनी परिश्रम घेतले.

कार्यक्रमाचे सूत्रसंचालन सावळेपाटील यांनी केले, तर आभार ऐश्वर्या बागल यांनी मानले.

महिलांच्या कष्टाला बाजारपेठ, त्यांच्या कौशल्याला प्रोत्साहन आणि स्वदेशी उत्पादनांना ग्राहकांचा प्रतिसाद मिळवून देणारा जिजाऊ सेवा संघाचा हा दिवाळी फेस्टिव्हल महिला आर्थिक सक्षमीकरणाच्या दिशेने महत्त्वपूर्ण पाऊल ठरत आहे.