बारामतीतील जळोची रोडवरील जलतरण तलावाच्या कामात सुरक्षा नियमांकडे दुर्लक्ष?

बारामतीतील जळोची रोडवरील जलतरण तलावाच्या कामात सुरक्षा नियमांकडे दुर्लक्ष?

व्हायरल व्हिडिओनंतर चौकशीची मागणी

बारामती वार्तापत्र

बारामती शहरातील जळोची रोड परिसरात सुरू असलेल्या सार्वजनिक जलतरण तलावाच्या बांधकामावरून नव्या वादाला तोंड फुटले आहे. सोशल मीडियावर व्हायरल झालेल्या एका व्हिडिओमुळे या कामावर असलेल्या मजुरांच्या सुरक्षेच्या नियमांचे पालन होत नाही. संबंधित कामाची सखोल चौकशी करण्याची मागणी नागरिकांकडून होत आहे.

मात्र, व्हिडिओतील दावे आणि आरोपांची अधिकृत पुष्टी अद्याप झालेली नाही.
व्हायरल व्हिडिओमध्ये काही मजूर उंचावर काम करताना हेल्मेट, सेफ्टी बेल्ट, सेफ्टी हार्नेस, सुरक्षा बूट यांसारखी अनिवार्य सुरक्षा साधने वापरत नसल्याचे दिसत असल्याचा दावा सोशल मीडियावर केला जात आहे.

कामगारांच्या जीवितास धोका निर्माण होऊ शकतो, अशी चिंता व्यक्त केली जात आहे.
बांधकामाच्या गुणवत्तेबाबतही प्रश्नचिन्ह उपस्थित करण्यात आले आहे. काही ठिकाणी कॉलमच्या लोखंडी जाळीवरच संरक्षणात्मक ग्रील उभारण्यात आल्याचा, तसेच काही भागांमध्ये काँक्रीटीकरणाचे काम अपूर्ण अवस्थेत असल्याचा दावा केला जात आहे. त्यामुळे कामाचा दर्जा, तांत्रिक निकष आणि वापरण्यात आलेल्या साहित्याची गुणवत्ता यांची स्वतंत्र तांत्रिक तपासणी करण्याची मागणी होत आहे.
बांधकाम क्षेत्रातील सुरक्षा नियमांनुसार उंचावर काम करणाऱ्या कामगारांसाठी आवश्यक सुरक्षा साधनांचा वापर बंधनकारक मानला जातो. त्यामुळे संबंधित शासकीय विभाग, कामगार विभाग आणि तांत्रिक अधिकाऱ्यांनी घटनास्थळी प्रत्यक्ष पाहणी करून सुरक्षा नियमांचे पालन झाले आहे का, तसेच करारातील अटी व तांत्रिक मानकांचे पालन करण्यात आले आहे का, याची पडताळणी करावी, अशी अपेक्षा नागरिकांनी व्यक्त केली आहे.
—-
सार्वजनिक निधीतून उभारल्या जाणाऱ्या विकासकामांमध्ये सुरक्षितता आणि दर्जा या दोन्ही बाबींना सर्वोच्च प्राधान्य असणे आवश्यक आहे. त्यामुळे या कामाची निष्पक्ष चौकशी करून नियमभंग अथवा निकृष्ट दर्जाचे काम आढळल्यास संबंधितांवर नियमानुसार कारवाई करण्यात यावी, अशी मागणी जोर धरत आहे.