‘काम न करता ५२ कोटींचे बिल’; बारामती–इंदापूर पालखी महामार्गावर चौकशीची मागणी

‘काम न करता ५२ कोटींचे बिल’; बारामती–इंदापूर पालखी महामार्गावर चौकशीची मागणी

भरणे-मोहोळ यांच्या नावाचा वापर करून धमक्या?

बारामती वार्तापत्र 

बारामती–इंदापूर संत तुकाराम महाराज पालखी महामार्गाच्या कामावरून गंभीर आरोप समोर आले आहेत. सुमारे ४२ किलोमीटरच्या या मार्गावरील काही कामे प्रत्यक्षात अपूर्ण असतानाही ती कागदोपत्री पूर्ण दाखवून तब्बल ५२ कोटी रुपयांची बिले काढण्यात आल्याचा दावा सब-कंत्राटदार संजय (संजू) चव्हाण आणि त्यांचे कायदेशीर सल्लागार ॲड. रमेश राठोड यांनी केला आहे.
चव्हाण यांच्या आरोपानुसार, संबंधित ठेकेदार आणि NHAIच्या काही अधिकाऱ्यांनी संगनमत करून अपूर्ण कामे पूर्ण झाल्याचे दाखवले आणि त्याआधारे कोट्यवधी रुपयांची बिले अदा करण्यात आली. या कथित गैरव्यवहाराची प्रत्यक्ष पाहणी करून चौकशी करण्याची मागणी त्यांनी केली आहे.
पालखी महामार्ग हा केंद्र आणि राज्य सरकारचा महत्त्वाकांक्षी प्रकल्प असून, बारामती–इंदापूर मार्गावरील काही ठिकाणी काम संथ गतीने सुरू असल्याने वाहनचालक आणि स्थानिक नागरिकांना अडचणींचा सामना करावा लागत असल्याचा दावा करण्यात आला आहे.
५२ कोटींच्या आरोपाची चौकशीची मागणी
प्रत्यक्षात किती काम झाले, किती काम अपूर्ण आहे, कागदोपत्री किती काम पूर्ण दाखवण्यात आले आणि त्यासाठी किती रक्कम अदा झाली, याची सखोल तपासणी करण्याची मागणी करण्यात आली आहे. तसेच संबंधित ठेकेदार, NHAI अधिकारी आणि इतर जबाबदार व्यक्तींची भूमिकाही तपासण्याची मागणी आहे.
या प्रकरणात मंत्री दत्तात्रय भरणे आणि केंद्रीय मंत्री मुरलीधर मोहोळ यांच्या नावाचा वापर करून धमक्या दिल्याचाही आरोप करण्यात आला आहे. मात्र, हे आरोप चव्हाण आणि ॲड. राठोड यांनी केलेले असून, त्यांची स्वतंत्र अधिकृत पुष्टी झालेली नाही. त्यामुळे आरोपांची सत्यता निष्पक्ष चौकशीतून स्पष्ट होणे आवश्यक आहे.
मंत्री दत्तात्रय भरणे यांना सवाल
बारामती–इंदापूर पालखी महामार्गाच्या कामात ५२ कोटी रुपयांचे काम न करता बिले काढल्याचा आरोप करण्यात आला आहे. तसेच आपल्या नावाचा वापर करून धमक्या दिल्या जात असल्याचा दावा सब-कंत्राटदार संजू चव्हाण यांनी केला आहे. या गंभीर आरोपांवर आपली भूमिका काय?
केंद्रीय मंत्री मुरलीधर मोहोळ यांना सवाल
पालखी महामार्गाच्या कथित ५२ कोटी रुपयांच्या गैरव्यवहाराबाबत सब-कंत्राटदार संजू चव्हाण यांनी गंभीर आरोप केले आहेत. तसेच आपल्या नावाचा वापर करून धमक्या दिल्याचाही दावा केला आहे. या आरोपांबाबत आपले स्पष्टीकरण काय? या प्रकरणाची स्वतंत्र चौकशी व्हावी, अशी आपली भूमिका आहे का?
अपूर्ण काम पूर्ण दाखवून खरोखरच कोट्यवधी रुपयांची बिले काढण्यात आली का? ५२ कोटी रुपयांच्या आरोपात नेमके तथ्य किती? आणि या संपूर्ण प्रकरणात जबाबदार कोण? या प्रश्नांची उत्तरे अधिकृत चौकशीनंतरच स्पष्ट होणार आहेत.