बँक कर्मचाऱ्यांचा ‘पाच दिवसांच्या आठवड्या’साठी आवाज बुलंद! SBIसह विविध राष्ट्रीयकृत बँकांतील अधिकारी-कर्मचाऱ्यांचे बारामतीत आंदोलन

बँक कर्मचाऱ्यांचा ‘पाच दिवसांच्या आठवड्या’साठी आवाज बुलंद!
SBIसह विविध राष्ट्रीयकृत बँकांतील अधिकारी-कर्मचाऱ्यांचे बारामतीत आंदोलन

डिजिटल बँकिंगचा ताण वाढला.

बारामती वार्तापत्र 

राष्ट्रीयकृत बँकांमधील अधिकारी व कर्मचाऱ्यांसाठी पाच दिवसांचा आठवडा लागू करावा, या प्रमुख मागणीसाठी बारामतीत स्टेट बँक ऑफ इंडिया (SBI)सह विविध राष्ट्रीयकृत बँकांमधील अधिकारी व कर्मचाऱ्यांनी आंदोलन केले.

केंद्र व राज्य सरकारच्या शासकीय सेवेत कार्यरत अधिकारी-कर्मचाऱ्यांसाठी पाच दिवसांचा आठवडा लागू करण्यात आला आहे. त्याच धर्तीवर बँकिंग क्षेत्रातही आठवड्यातील दोन दिवस साप्ताहिक सुट्टी देण्यात यावी, अशी मागणी आंदोलकांनी केली.

कामाचा वाढता ताण; पाच दिवसांचा आठवडा का आवश्यक?

बँकिंग क्षेत्रात गेल्या काही वर्षांत मोठे बदल झाले आहेत. डिजिटल बँकिंग, ऑनलाइन व्यवहार, ग्राहकांच्या वाढत्या अपेक्षा आणि विविध बँकिंग सेवांमुळे अधिकारी व कर्मचाऱ्यांच्या जबाबदाऱ्यांमध्ये मोठी वाढ झाली आहे.

कामाचा वाढता ताण आणि बदलती बँकिंग व्यवस्था लक्षात घेता कर्मचाऱ्यांना दोन दिवस साप्ताहिक विश्रांती मिळणे आवश्यक आहे, अशी भूमिका यावेळी आंदोलनकर्त्यांनी मांडली.

केंद्र-राज्य सरकारने तातडीने निर्णय घ्यावा

राष्ट्रीयकृत बँक कर्मचाऱ्यांच्या या मागणीची केंद्र व राज्य सरकारने तातडीने दखल घ्यावी आणि राष्ट्रीयकृत बँकांमध्ये पाच दिवसांचा आठवडा लागू करण्याबाबत निर्णय घ्यावा, अशी मागणी यावेळी करण्यात आली.

“सरकारी सेवेत पाच दिवसांचा आठवडा लागू होऊ शकतो, तर देशाच्या आर्थिक व्यवस्थेचा कणा असलेल्या बँक कर्मचाऱ्यांनाही दोन दिवसांची साप्ताहिक सुट्टी मिळायला हवी,” अशी भावना आंदोलनातून व्यक्त करण्यात आली.