दादांच्या एका फोनवर मैदान खुले; आता सुनेत्रा पवारांकडे निवेदन देऊनही कुलूप का कायम?

दादांच्या एका फोनवर मैदान खुले; आता सुनेत्रा पवारांकडे निवेदन देऊनही कुलूप का कायम?

नागरिकांना मैदानासाठी आणखी किती प्रतीक्षा करावी लागणार

बारामती वार्तापत्र 

बारामतीकरांनी सकाळी चालायला जायचे कुठे? ज्येष्ठ नागरिकांनी मोकळ्या हवेत व्यायाम करायचा तरी कुठे? आरोग्य जपण्यासाठी शहरातील उपलब्ध मैदानही बंद असेल, तर नागरिकांनी पर्याय शोधायचा कुठे? टीसी कॉलेजचे मैदान बंद असल्याने बारामतीकरांसमोर हे प्रश्न उभे राहिले आहेत. नियमित चालणे, व्यायाम करणे आणि आरोग्याची काळजी घेणे हा अनेक नागरिकांच्या दिनक्रमाचा भाग असताना, मैदानाला कुलूप असल्याने नागरिकांची गैरसोय होत नाही का?

मैदान खुले असताना नागरिकांना शहरातच चालण्यासाठी आणि व्यायामासाठी मोकळी जागा उपलब्ध होती. आता मैदान बंद असल्याने विशेषतः ज्येष्ठ नागरिकांनी आपल्या नियमित दिनक्रमासाठी दुसरीकडे जायचे का? पर्यायी जागा सहज उपलब्ध नसलेल्या नागरिकांनी काय करायचे? नागरिकांच्या आरोग्याशी संबंधित या प्रश्नाकडे गांभीर्याने पाहण्याची गरज नाही का?

दादांच्या एका फोनवर मैदान खुले; मग आता कुलूप कायम का?

यापूर्वीही मैदान बंद करण्याचा प्रकार घडला होता. त्यावेळी दिवंगत उपमुख्यमंत्री अजित पवार यांनी फोनवरून निर्देश दिल्यानंतर मैदान खुले करण्यात आले होते. मग त्यावेळी सुटलेला प्रश्न पुन्हा निर्माण का झाला? मैदान कायमस्वरूपी खुले ठेवण्याबाबत काही व्यवस्था करण्यात आली होती का? नसेल, तर नागरिकांना पुन्हा त्याच समस्येला सामोरे का जावे लागत आहे?

एका फोनवर मैदान खुले होऊ शकले, तर आता मैदान पुन्हा खुले करण्यासाठी कोणता निर्णय आवश्यक आहे? प्रत्येक वेळी नागरिकांनी लोकप्रतिनिधींकडे धाव घ्यायची का? या प्रश्नावर कायमस्वरूपी तोडगा कधी निघणार?

सुनेत्रा पवारांकडे निवेदन; मग कार्यवाही कुठपर्यंत पोहोचली?

मैदान खुले करण्याच्या मागणीसाठी उपमुख्यमंत्री सुनेत्रा पवार यांच्याकडे निवेदन देण्यात आले. त्यांनी ते संस्थेतील जबाबदार व्यक्तीकडे दिल्याचे सांगण्यात येते. त्यानंतर मैदान खुले होईल, अशी नागरिकांची अपेक्षा होती. मात्र, अद्याप कुलूप कायम असल्याने निवेदनावर नेमकी काय कार्यवाही झाली, हा प्रश्न उपस्थित होत आहे.

निवेदन संबंधित व्यक्तीकडे दिल्यानंतर पुढे कोणती पावले उचलण्यात आली? मैदान खुले करण्याबाबत काही निर्णय झाला आहे का? झाला असेल, तर त्याची अंमलबजावणी कधी होणार? आणि निर्णय अद्याप झाला नसेल, तर नागरिकांना आणखी किती दिवस प्रतीक्षा करावी लागणार?

मैदान बंद ठेवण्याचे कारण काय? नागरिकांना माहिती मिळणार का?

टीसी कॉलेजचे मैदान नेमक्या कोणत्या कारणामुळे बंद ठेवण्यात आले आहे? मैदान खुले करण्यासाठी काही अटी किंवा प्रशासकीय अडचणी आहेत का? असल्यास, त्याबाबत नागरिकांना स्पष्ट माहिती देण्यात येणार का? मैदानाच्या वापराबाबत संस्थेची भूमिका काय आहे, हे स्पष्ट होणे आवश्यक नाही का?

हा प्रश्न केवळ एका मैदानापुरता मर्यादित नाही. नागरिकांच्या दैनंदिन व्यायामाचा, ज्येष्ठांच्या आरोग्याचा आणि शहरातील मोकळ्या जागांच्या उपलब्धतेचा हा विषय आहे. त्यामुळे मैदान बंद ठेवण्यामागील कारणे स्पष्ट करणे आणि नागरिकांच्या अडचणींचा विचार करणे गरजेचे नाही का?

चौकट : नियमावली काय सांगते?

महाराष्ट्र सार्वजनिक विद्यापीठ अधिनियम, २०१६ मधील कलम ५७, ५८ व १०८ नुसार क्रीडा सुविधा आणि महाविद्यालयाच्या संलग्नतेच्या अटींच्या अनुषंगाने मैदानाच्या वापराची तपासणी करता येते. शासन व विद्यापीठाच्या अनुदानाच्या अटी तपासून मैदान बंद करण्याच्या निर्णयाचा खुलासा करणे आवश्यक आहे.

बारामतीकरांना उत्तर कधी मिळणार? मैदान खुले होणार तरी कधी?

नागरिकांनी निवेदन दिले, लोकप्रतिनिधींकडे मागणी केली; तरीही मैदान बंद असेल, तर पुढील कार्यवाही कोण करणार? संस्थेचे पदाधिकारी याबाबत स्पष्ट भूमिका कधी मांडणार? सुनेत्रा पवारांकडे दिलेल्या निवेदनानंतर मैदान खुले करण्यासाठी कोणता निर्णय घेतला जाणार?

बारामतीकरांची मागणी एवढीच—मैदान बंद ठेवण्यामागचे कारण स्पष्ट करा, निवेदनावरील कार्यवाहीची माहिती द्या आणि मैदान पुन्हा खुले करण्याची तारीख कधी जाहीर करणार, हे सांगा!

नागरिकांच्या आरोग्यासाठी महत्त्वाची असलेली ही जागा पुन्हा उपलब्ध होणार का? की बारामतीकरांना आपल्या हक्काच्या मोकळ्या जागेसाठी आणखी प्रतीक्षा करावी लागणार? आता या प्रश्नांची उत्तरे संबंधित संस्थेचे पदाधिकारी आणि जबाबदार यंत्रणा कधी देणार, याकडे नागरिकांचे लक्ष लागले आहे.