बारामती एसटी स्टँडवर ‘दहशतवादी हल्ल्या’ची मॉक ड्रिल; BDDS पथकासह पोलिसांची आपत्कालीन सज्जतेची रंगीत तालीम

बारामती एसटी स्टँडवर ‘दहशतवादी हल्ल्या’ची मॉक ड्रिल; BDDS पथकासह पोलिसांची आपत्कालीन सज्जतेची रंगीत तालीम

काल्पनिक दोन संशयितांना ताब्यात घेत बॉम्बसदृश ब्रीफकेस निष्प्रभ करण्याचे प्रात्यक्षिक; ४० पोलीस अंमलदार व होमगार्डचा सहभाग

बारामती वार्तापत्र 

गर्दीच्या सार्वजनिक ठिकाणी संशयास्पद वस्तू, बॉम्बची धमकी किंवा दहशतवादी स्वरूपाची आपत्कालीन परिस्थिती उद्भवल्यास पोलिसांनी वेगाने, शिस्तबद्धपणे आणि समन्वयाने कसा प्रतिसाद द्यावा, याची प्रत्यक्ष तयारी तपासण्यासाठी बारामती एसटी स्टँडवर बारामती शहर पोलीस स्टेशन आणि बॉम्ब डिटेक्शन अँड डिस्पोजल स्क्वॉड (BDDS) यांच्या संयुक्त विद्यमाने मॉक ड्रिल घेण्यात आली.

ही मॉक ड्रिल पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार आणि उपविभागीय पोलीस अधिकारी चैतन्य कदम यांच्या मार्गदर्शनाखाली, प्रभारी परिविक्षाधीन DySP मनिषा ओमासे आणि पोलीस निरीक्षक श्रीशैल चिवडशेट्टी यांच्या संयुक्त पुढाकाराने व नियोजनातून पार पडली.

संशयितांना ताब्यात घेण्यापासून बॉम्बसदृश वस्तू निष्प्रभ करण्यापर्यंत सराव

मॉक ड्रिलदरम्यान एसटी स्टँड परिसरात काल्पनिक आपत्कालीन परिस्थिती निर्माण करण्यात आली. दोन संशयितांना ताब्यात घेणे, त्यांच्या ताब्यातील बॉम्बसदृश ब्रीफकेस ओळखणे, परिसर सुरक्षित करणे आणि नागरिकांना धोक्याच्या क्षेत्रापासून दूर करण्याची कार्यवाही करण्यात आली.

यानंतर प्रशिक्षित BDDS पथकाने विशेष सुरक्षा साधने व उपकरणांच्या सहाय्याने संशयास्पद वस्तू सुरक्षितरीत्या हाताळून निष्प्रभ करण्याचे प्रात्यक्षिक केले.

४० पोलीस अंमलदार आणि होमगार्डचा सहभाग

मॉक ड्रिलमध्ये बारामती शहर पोलीस स्टेशनमधील सुमारे ४० पोलीस अंमलदार आणि होमगार्ड जवानांनी सहभाग घेतला. संशयास्पद वस्तू आढळल्यानंतर परिसर सुरक्षित करणे, नागरिकांना सुरक्षित अंतरावर हलविणे, गर्दी व वाहतूक नियंत्रित करणे, वरिष्ठ अधिकाऱ्यांना माहिती देणे आणि BDDS पथकासाठी सुरक्षित कार्यक्षेत्र उपलब्ध करून देणे याचा प्रत्यक्ष सराव करण्यात आला.

BDDS पथकासह प्रशिक्षित श्वान ‘मॉन्टी’चा सहभाग

या मॉक ड्रिलमध्ये BDDS पथकातील पोलीस उपनिरीक्षक किशोर अंबुडकर, GPSI बाळू वाईकर, पोलीस हवालदार रोहित आरवडे, पोलीस शिपाई यश कठाळे, जुबेर शेख, सुधीर घोरपडे, संभाजी पाटील तसेच प्रशिक्षित श्वान ‘मॉन्टी’ सहभागी झाले.

विशेष संरक्षक पोशाख, प्रशिक्षित श्वान आणि संशयास्पद वस्तू हाताळण्यासाठी वापरण्यात येणारी उपकरणे यांचे प्रात्यक्षिकही यावेळी करण्यात आले.

‘प्रत्येक अंमलदाराला आपली भूमिका माहिती असणे गरजेचे’

प्रभारी परिविक्षाधीन DySP मनिषा ओमासे यांनी आपत्कालीन परिस्थितीत प्रत्येक पोलीस अंमलदाराला आपली भूमिका स्पष्टपणे माहिती असणे, नागरिकांची सुरक्षितता प्रथम प्राधान्याने जपणे आणि विशेष पथकांमध्ये योग्य समन्वय राखणे आवश्यक असल्यावर भर दिला.

पोलीस निरीक्षक श्रीशैल चिवडशेट्टी यांनी घटनास्थळ नियंत्रण, कर्मचारी नियुक्ती, गर्दी व्यवस्थापन आणि BDDS पथकाशी समन्वय यावर प्रत्यक्ष लक्ष दिले.

नागरिकांसाठी पोलिसांचे आवाहन

सार्वजनिक ठिकाणी बेवारस बॅग, ब्रीफकेस, पॅकेट किंवा अन्य संशयास्पद वस्तू आढळल्यास तिला हात लावू नये, उघडू नये किंवा हलवू नये. परिसरातील नागरिकांना दूर ठेवून तात्काळ पोलिसांना माहिती द्यावी. अनावश्यक गर्दी करणे, अफवा पसरविणे किंवा फोटो-व्हिडिओसाठी धोकादायक ठिकाणी जाणे टाळावे, असे आवाहन पोलिसांनी केले.

“संशयास्पद वस्तूला हात नको—तात्काळ पोलिसांना माहिती द्या. प्रशिक्षित पोलीस, सज्ज यंत्रणा आणि सुरक्षित नागरिक,” असा संदेश या मॉक ड्रिलमधून देण्यात आला.

बारामती शहर पोलीस स्टेशन, पुणे ग्रामीण पोलीस यांच्या वतीने घेण्यात आलेल्या या सरावातून आपत्कालीन परिस्थितीत त्वरित प्रतिसाद, गर्दी नियंत्रण, BDDS समन्वय आणि नागरिकांची सुरक्षितता याबाबतची प्रत्यक्ष तयारी तपासण्यात आली.