बारामतीत न्यायालयीन कर्मचाऱ्यांचे ‘समान काम, समान वेतन’साठी आंदोलन

बारामतीत न्यायालयीन कर्मचाऱ्यांचे ‘समान काम, समान वेतन’साठी आंदोलन

महिला-पुरुष कर्मचाऱ्यांचा उत्स्फूर्त सहभाग; सकाळचे आंदोलन शांततेत पार पडले, दिवसभर काळी फीत लावून निषेध

बारामती वार्तापत्र 

न्यायालयीन कर्मचाऱ्यांच्या विविध मागण्यांकडे शासनाचे लक्ष वेधण्यासाठी आज, १६ सप्टेंबर २०२६ रोजी, न्यायालयीन कर्मचाऱ्यांनी ‘समान काम, समान वेतन’ या प्रमुख मागणीसाठी आंदोलन केले. या आंदोलनात न्यायालयातील महिला व पुरुष कर्मचाऱ्यांनी मोठ्या संख्येने उपस्थित राहून सहभाग नोंदविला.

सकाळच्या सत्रात कर्मचाऱ्यांनी एकत्र येत शांततेच्या मार्गाने आंदोलन केले. आंदोलनादरम्यान कोणत्याही प्रकारच्या घोषणाबाजी अथवा गोंधळाला फाटा देत शांततेत आणि शिस्तबद्ध पद्धतीने आंदोलन पार पडले.

या आंदोलनाचा एक भाग म्हणून आज दिवसभर सर्व न्यायालयीन कर्मचारी काळी फीत लावून कामकाज करणार असून, त्यातून आपल्या मागण्यांकडे शासन व संबंधित प्रशासनाचे लक्ष वेधण्याचा प्रयत्न केला जाणार आहे.

न्यायालयीन कर्मचाऱ्यांच्या कामाचे स्वरूप, जबाबदाऱ्या आणि कामाचा ताण लक्षात घेता ‘समान कामासाठी समान वेतन’ मिळावे, अशी कर्मचाऱ्यांची मागणी आहे. या मागणीसाठी कर्मचाऱ्यांनी एकजुटीने सहभाग घेत शांततामय मार्गाने आपला निषेध नोंदविला.

दरम्यान, आंदोलनामुळे न्यायालयीन कामकाजावर परिणाम होऊ नये, यासाठी कर्मचाऱ्यांनी शिस्तबद्ध पद्धतीने आंदोलन करण्याची भूमिका घेतली आहे. आपल्या मागण्यांबाबत शासनाने सकारात्मक भूमिका घेऊन योग्य तो निर्णय घ्यावा, अशी अपेक्षा कर्मचाऱ्यांकडून व्यक्त करण्यात आली.