बारामतीच्या सारंग सूर्यवंशीची जलतरणात सुवर्णभरारी! राज्यस्तरीय स्पर्धेत तीन पदकांची कमाई!

बारामतीच्या सारंग सूर्यवंशीची जलतरणात सुवर्णभरारी! राज्यस्तरीय स्पर्धेत तीन पदकांची कमाई!

गोल्ड, सिल्व्हर आणि ब्राँझ मेडलवर नाव कोरले; राष्ट्रीय स्पर्धेसाठी भोपाळमध्ये झेप!

बारामती वार्तापत्र 

विद्या प्रतिष्ठानचे कमलनयन बजाज इन्स्टिट्यूट ऑफ इंजिनिअरिंग अँड टेक्नॉलॉजी, बारामती येथील द्वितीय वर्षाचा विद्यार्थी सारंग प्रवीण सूर्यवंशी याने राज्यस्तरीय पॅरालिम्पिक जलतरण स्पर्धेत नेत्रदीपक यश संपादन केले आहे. पुणे येथील बालेवाडी येथे रविवार, दि. १८ ऑक्टोबर २०२६ रोजी झालेल्या या स्पर्धेत सारंगने सुवर्ण, रौप्य आणि कांस्य अशी तीन वेगवेगळी पदके पटकावून बारामतीच्या शिरपेचात मानाचा तुरा रोवला.

सारंग हा विद्या प्रतिष्ठानच्या कमलनयन बजाज इन्स्टिट्यूट ऑफ इंजिनिअरिंग अँड टेक्नॉलॉजी महाविद्यालयात कृत्रिम बुद्धिमत्ता आणि डेटा सायन्स (Artificial Intelligence and Data Science) या अभियांत्रिकी शाखेत द्वितीय वर्षात शिक्षण घेत आहे. शिक्षणासोबतच जलतरण क्षेत्रात सातत्यपूर्ण मेहनत आणि जिद्दीच्या जोरावर त्याने उल्लेखनीय कामगिरी केली आहे.

राज्यस्तरीय पॅरालिम्पिक जलतरण स्पर्धेत त्याने तीन वेगवेगळ्या पदकांसह प्रमाणपत्रे मिळविली. विशेष म्हणजे, सारंगने सलग मागील तीन वर्षांपासून राज्यस्तरीय तसेच राष्ट्रीय स्पर्धांमध्ये यश मिळवून आपली कामगिरी सातत्याने उंचावली आहे.

त्याच्या या उल्लेखनीय कामगिरीची दखल घेत नोव्हेंबर महिन्यात भोपाळ येथे होणाऱ्या राष्ट्रीय जलतरण स्पर्धेसाठी त्याची निवड झाली आहे. राष्ट्रीय स्तरावरही उत्कृष्ट कामगिरी करण्यासाठी सारंग सज्ज झाला असून, त्याच्या पुढील वाटचालीकडे क्रीडाप्रेमींचे लक्ष लागले आहे.

सारंगच्या या अभूतपूर्व यशाबद्दल महाविद्यालयाचे प्राचार्य, व्यवस्थापकीय संचालक मंडळ, शिक्षक व शिक्षकेतर कर्मचारी, विद्यार्थी तसेच वीर सावरकर जलतरण तलाव, बारामती यांच्या संपूर्ण संचालक मंडळाकडून त्याचे विशेष कौतुक व अभिनंदन करण्यात आले. आगामी राष्ट्रीय स्पर्धेसाठी त्याला शुभेच्छा देण्यात आल्या.

जिद्द, मेहनत आणि सातत्याच्या जोरावर सारंगने मिळवलेले हे यश बारामतीच्या क्रीडा क्षेत्रासाठी अभिमानास्पद ठरले आहे.