शिक्षक ते शिक्षणसंस्थेचे संस्थापक; लक्ष्मण हरणावळ पुणे पदवीधर निवडणुकीच्या रिंगणात!

ग्रामीण विद्यार्थ्यांना आयआयटी, एनआयटी, एमबीबीएसच्या दिशेने वाटचाल करण्यासाठी मार्गदर्शन; अपक्ष उमेदवार म्हणून मतदारांना साद

इंदापूर :

शिक्षक म्हणून सेवेला सुरुवात करून ग्रामीण भागातील विद्यार्थ्यांच्या शैक्षणिक प्रगतीसाठी शिक्षणसंस्था उभारणारे गोखळी येथील गुरुकुल विद्यामंदिरचे संस्थापक-अध्यक्ष लक्ष्मण साहेबराव हरणावळ (गुरुजी) पुणे विभाग पदवीधर मतदारसंघाच्या निवडणुकीत अपक्ष उमेदवार म्हणून रिंगणात उतरले आहेत. शैक्षणिक क्षेत्रातील अनुभव आणि ग्रामीण विद्यार्थ्यांसाठी केलेल्या कामाच्या जोरावर त्यांनी पदवीधर मतदारांचे लक्ष वेधण्याचा प्रयत्न केला आहे.

शिक्षकाची नोकरी सोडून शिक्षण क्षेत्रात नवा प्रवास

हरणावळ यांनी २००७ ते २०१५ या कालावधीत इंदापूर तालुक्यातील तरंगवाडी येथील जिल्हा परिषद प्राथमिक शाळेत शिक्षक म्हणून काम केले. २०११ मध्ये त्यांनी एमपीएससी राज्यसेवा मुलाखतीसाठी पात्रता मिळवली. मात्र, २०१६ मध्ये सरकारी नोकरीचा राजीनामा देऊन त्यांनी गोखळी येथे गुरुकुल विद्यामंदिरची स्थापना केली. ग्रामीण भागातील विद्यार्थ्यांना शिक्षणाच्या माध्यमातून प्रगतीच्या संधी उपलब्ध करून देण्याच्या उद्देशाने त्यांनी संस्थात्मक कार्याला सुरुवात केली.

व्यावसायिक शिक्षणाच्या संधींवर भर

गुरुकुल विद्यामंदिरच्या माध्यमातून विद्यार्थ्यांना उच्च शिक्षणाच्या दिशेने मार्गदर्शन करण्यात येत असल्याचे त्यांनी सांगितले.. २०२१ ते २०२६ या कालावधीतील माहितीनुसार, संस्थेच्या विद्यार्थ्यांपैकी १२ विद्यार्थ्यांनी आयआयटी, १४ विद्यार्थ्यांनी एनआयटी, तर २२ विद्यार्थ्यांनी एमबीबीएस अभ्यासक्रमाच्या प्रवेशाच्या दिशेने वाटचाल केल्याचा दावा करण्यात आला आहे. ग्रामीण भागातील विद्यार्थ्यांनाही स्पर्धात्मक शैक्षणिक संधी मिळाव्यात, हा या उपक्रमामागील महत्त्वाचा उद्देश असल्याचे  स्पष्ट होते.

पुरस्कारांनी कार्याचा गौरव

२०२५ मध्ये हरणावळ यांना एबीपी माझाच्या ‘महाराष्ट्राचे अनमोल रत्न’ पुरस्काराने सन्मानित करण्यात आले. तसेच आदर्श संस्थाचालक पुरस्कारानेही त्यांचा गौरव झाल्याचा उल्लेख आहे.

अनुक्रमांक ४४, पसंतीक्रमांक १ देण्याचे आवाहन

पुणे विभाग पदवीधर मतदारसंघातून अपक्ष उमेदवारी करताना लक्ष्मण हरणावळ यांनी मतदारांना अनुक्रमांक ४४ आणि पसंतीक्रमांक १ देऊन विजयी करण्याचे आवाहन केले आहे. त्यांनी दिलेल्या माहितीनुसार, शुक्रवार, दि. २३ ऑक्टोबर २०२६ रोजी सकाळी ८ ते दुपारी ४ या वेळेत मतदान होणार आहे.

शैक्षणिक क्षेत्रातील अनुभव आणि ग्रामीण विद्यार्थ्यांसाठी उभारलेले कार्य हीच आपली प्रमुख ओळख असल्याचे मतदारांसमोर मांडत लक्ष्मण हरणावळ यांनी निवडणुकीत आपली भूमिका स्पष्ट केली आहे.