छत्रपती शिवाजी महाराज प्रत्येक पिढीला प्रेरणा देणारे बहुजनांचे राजे : ॲड.राहुल मखरे

छत्रपती शिवाजी महाराज प्रत्येक पिढीला प्रेरणा देणारे बहुजनांचे राजे : ॲड.राहुल मखरे

इंदापुरात छत्रपती शिवाजी महाराजांच्या अश्वारुढ पुतळ्याची मिरवणूक ठरली लक्षवेधी

इंदापूर : प्रतिनिधी

सालाबाद प्रमाणे डॉ.बाबासाहेब आंबेडकर जयंती महोत्सव समिती ट्रस्टच्या वतीने छत्रपती शिवाजी महाराज यांच्या अश्वारूढ पुतळ्याची मिरवणूक काढून ३९२वी जयंती मोठ्या जल्लोषात साजरी करण्यात आली. राज्यमंत्री दत्तात्रय भरणे यांनी भिमाई आश्रमशाळा या ठिकाणी शिवरायांच्या पुतळ्यास पुष्पहार अर्पण करून मानवंदना दिली व सर्वांना शिवजयंतीच्या शुभेच्छा दिल्या.

शिवरायांच्या पुतळ्याचे पूजन इंदापूरच्या नगराध्यक्षा अंकिता शहा व पीडीसीसी बँकेचे संचालक अप्पासाहेब जगदाळे यांच्या हस्ते करण्यात आले.तद्नंतर आंबेडकरनगर येथून भव्य मिरवणुकीला प्रारंभ झाला. बँड,ढोल,ताशाच्या गजरात शिवजयंतीची मिरवणूक उत्साहपूर्वक वातावरणात निघाली. मिरवणुकीत तरुण वर्गासह महिलांचा सहभाग लक्षणीय होता. लहान बालके मावळे होऊन घोड्यावर स्वार झाले होते. शहरातील मुख्य रस्त्यात शिवप्रेमींनी बँड,हलगी तुतारीच्या निनादात ठेका धरत नृत्य केले.मिरवणुकीचा समारोप नगरपालिका मैदानात झाला.

मोहोळचे आमदार यशवंत माने यांनी छत्रपती शिवाजी महाराज व डॉ. बाबासाहेब आंबेडकर यांच्या पुतळ्यांना व इंदापूर शहरातील शिवजयंतीचे प्रणेते दिवंगत रत्नाकर मखरे यांच्या प्रतिमेला पुष्पहार अर्पण करून अभिवादन केले.जयंती कमिटीचे आयोजक व बहुजन मुक्ती पार्टीची राष्ट्रीय महासचिव ॲड.राहुल मखरे यांनी प्रास्ताविक केले.ते म्हणाले की, जयंती कमिटी चे संस्थापक अध्यक्ष दिवंगत रत्नाकर मखरे यांनी शिवजयंतीची शहरांमध्ये परंपरा सुरू केली, त्यांनी सुरू केलेली परंपरा आम्ही अखंडपणे सुरू ठेवू. छत्रपती शिवाजी महाराज प्रत्येक पिढीला प्रेरणा देणारे बहुजनांचे राजे होते. शिवरायांचा खरा इतिहास आपण जाणून घेणे आवश्यक असून तरुण पिढीने देखील शिवरायांच्या खऱ्या इतिहासाचा अभ्यास करावा. शिवराय हे संबंध महाराष्ट्राचे गौरवशाली राजे होते, असे गौरवोद्गार आपल्या प्रास्ताविकात ॲड.राहुल मखरेंनी काढले.यावेळी उपस्थित मान्यवरांचा छोटेखानी सत्कार पार पडला.

यावेळी ॲड. समीर टिळेकर, कैलास चव्‍हाण यांची भाषणं झाली. यावेळी मुकुंद शहा, डी.एन जगताप,महारुद्र पाटील, शुभम निंबाळकर, भारत अहिवळे, वसंतराव साळवे, अंकुश सोनवणे, बाळासाहेब वाघमारे, अनिल अवसरमल,कैलास कदम,गजानन गवळी, गोपीचंद गलांडे, विलास शिंदे मधुकर जगताप,भास्कर साळवे, संग्राम भैलुमे, बाबजी भोंग,माऊली नाचण, हमीद आतार,बाळासाहेब सरवदे, हनुमंत कांबळे,अविनाश कोथमिरे, तानाजी धोत्रे, राजेंद्र हजारे, अश्वजीत कांबळे, शकुंतला मखरे, सुवर्णा मखरे आदी मान्यवर उपस्थित होते.

यावेळी नगरपालिका मैदानात विद्रोही शिवशाहीर राजेंद्र कांबळे यांचा शाहिरी जलसा कार्यक्रम पार पडला. शिवजयंतीचे नियोजन ॲड.समीर मखरे,गोरख तिकोटे यांनी केले. सूत्रसंचालन नानासाहेब सानप यांनी केले तर उपस्थितांचे आभार नानासाहेब चव्हाण यांनी मानले.