वाढदिवसाचा आनंद समाजासाठी; मूकबधिर विद्यार्थ्यांना खाऊ, शालेय साहित्य अन् वृक्षारोपण

केकपेक्षा समाजसेवेची निवड; डॉ. आकाश कांबळे यांच्या वाढदिवसानिमित्त विद्यार्थ्यांना मदत, वृक्षारोपण’

इंदापूर,-

वाढदिवसाचा उत्सव केवळ शुभेच्छा, सत्कार आणि औपचारिक कार्यक्रमांपुरता मर्यादित न ठेवता तो सामाजिक बांधिलकीच्या भावनेतून साजरा करण्याचा आदर्श भारतीय जनता पक्षाचे पुणे जिल्हा महामंत्री डॉ. आकाश कांबळे यांनी घालून दिला. त्यांच्या वाढदिवसानिमित्त इंदापूर तालुका भारतीय जनता पक्षाच्या वतीने मूकबधिर विद्यार्थ्यांना फळे व खाऊचे वाटप, रूई येथील विद्यार्थ्यांना शालेय साहित्य वितरण तसेच विविध ठिकाणी वृक्षारोपण करण्यात आले.

इंदापूर येथील मूकबधिर शाळेतील विद्यार्थ्यांना फळे व खाऊचे वाटप करून त्यांच्या चेहऱ्यावर आनंद फुलविण्यात आला. वाढदिवसाचा आनंद समाजातील गरजू व विविध घटकांसोबत वाटून घेत सामाजिक संवेदनशीलतेचा परिचय या उपक्रमातून देण्यात आला.

त्यानंतर रूई येथील जिल्हा परिषद प्राथमिक शाळेतील विद्यार्थ्यांना शालेय उपयोगी साहित्याचे वाटप करण्यात आले. शिक्षणासाठी आवश्यक साहित्य मिळाल्याने विद्यार्थ्यांना शैक्षणिक वाटचालीस प्रोत्साहन मिळाले. यावेळी शाळेच्या परिसरात वृक्षारोपण करून विद्यार्थ्यांना पर्यावरण संवर्धनाची जाणीव करून देण्यात आली.

रूई येथील प्रसिद्ध बाबीर बुवा देवस्थान परिसरातील ऑक्सिजन पार्कमध्येही वृक्षारोपण करण्यात आले. वाढत्या पर्यावरणीय आव्हानांच्या पार्श्वभूमीवर वृक्षलागवडीबरोबरच वृक्षसंवर्धनाची जबाबदारीही प्रत्येकाने स्वीकारणे गरजेचे असल्याचा संदेश या उपक्रमातून देण्यात आला.

वाढदिवसाच्या निमित्ताने आयोजित या सामाजिक आणि पर्यावरणपूरक उपक्रमांमुळे उत्सवाला विधायक स्वरूप प्राप्त झाले. स्वतःच्या आनंदापेक्षा समाजाच्या आनंदाला प्राधान्य देत केलेले हे उपक्रम सामाजिक बांधिलकीचा संदेश देणारे ठरले.

या वेळी पुणे जिल्हा परिषदेचे बांधकाम व आरोग्य विभागाचे सभापती प्रवीण माने, भाजपचे ज्येष्ठ नेते सदानंद अण्णा शिरदाळे, माऊली चवरे, शहराध्यक्ष किरण गाणबोटे, तालुकाध्यक्ष राजकुमार जठार, रामभाऊ आसबे, आबासाहेब थोरात, तानाजी मारकड, प्रवीणकुमार शहा, लखन जगताप, दीपक साळुंखे, सचिन लावंड, धनंजय आडके, अविनाश मोहिते, सागर पवार, आनंद शेंडे, अशोक मारकड यांच्यासह शाळेचे मुख्याध्यापक मारकड सर, उन्हाळे सर, मुलानी सर, भाजपचे पदाधिकारी व कार्यकर्ते, शिक्षक, विद्यार्थी आणि नागरिक मोठ्या संख्येने उपस्थित होते.