‘आदर्श गुरुजी’ सन्मानित; बारामतीच्या शाळा होणार ग्लोबल! सुनेत्रा पवारांची मोठी घोषणा

‘आदर्श गुरुजी’ सन्मानित; बारामतीच्या शाळा होणार ग्लोबल! सुनेत्रा पवारांची मोठी घोषणा

सुनेत्रा पवारांची शिक्षणासाठी मोठी घोषणा; पुणे जिल्ह्यातील ६०० शाळा ‘मॉडेल स्कूल’ करण्याचा निर्णय

बारामती वार्तापत्र 

“शिक्षण हे सर्वात मोठे शस्त्र असून शिक्षक हे राष्ट्राची खरी संपत्ती आहेत. ग्रामीण भागातील विद्यार्थ्यांना गुणवत्तापूर्ण आणि जागतिक दर्जाचे शिक्षण मिळावे, यासाठी बारामती तालुक्यातील शाळांचा दर्जा उंचावण्यासाठी शासनाकडून सर्वतोपरी सहकार्य केले जाईल,” अशी ग्वाही उपमुख्यमंत्री तथा पुणे जिल्ह्याच्या पालकमंत्री सुनेत्रा अजित पवार यांनी दिली.

पंचायत समिती बारामतीच्या वतीने आयोजित आदर्श शिक्षक पुरस्कार सोहळ्यात त्या बोलत होत्या. यावेळी विविध क्षेत्रातील मान्यवरांसह शिक्षक, गुणवंत विद्यार्थी आणि पालक मोठ्या संख्येने उपस्थित होते.

सुनेत्रा पवार यांनी सांगितले की, विद्यार्थ्यांना केवळ पाठ्यपुस्तकी ज्ञान देणे पुरेसे नाही. त्यांच्या मनात सत्यनिष्ठा, देशप्रेम, वैज्ञानिक दृष्टिकोन, आत्मविश्वास आणि मूल्यांची रुजवणूक करण्याचे महत्त्वाचे काम शिक्षकांनी करावे. बदलत्या काळानुसार शिक्षकांनी आधुनिक तंत्रज्ञान आत्मसात करून विद्यार्थ्यांना कौशल्याधारित शिक्षण देणे गरजेचे आहे.

“विद्यार्थ्यांनी वाचन करावे, विचार करावा, प्रश्न विचारावेत, स्वतःचे मत तयार करावे आणि अपयशाची भीती बाळगू नये,” असा कानमंत्रही त्यांनी विद्यार्थ्यांना दिला.

🏫 जिल्ह्यातील ६०० शाळा ‘मॉडेल स्कूल’ होणार

पुणे जिल्ह्यातील शिक्षणाचा दर्जा उंचावण्यासाठी यावर्षी जिल्हा परिषदेच्या ६०० शाळा ‘मॉडेल स्कूल’ करण्याचा निर्णय घेण्यात आल्याची माहिती सुनेत्रा पवार यांनी दिली. प्रत्येक जिल्हा परिषद शाळेत अद्ययावत संगणक कक्ष, ई-लर्निंग सुविधा आणि डिजिटल वर्गखोल्या उपलब्ध करून देण्यासाठी शासन प्रयत्नशील असल्याचे त्यांनी स्पष्ट केले.

राष्ट्रीय शैक्षणिक धोरणाच्या प्रभावी अंमलबजावणीसोबतच मुख्यमंत्री विज्ञानवारी, सायन्स सेंटर, समूह शाळा, आदर्श शाळा, दत्तक शाळा, प्रवेशोत्सव, आरोग्य तपासणी, सैनिकी शिक्षण, मोफत गणवेश आणि निपुण महाराष्ट्र अभियान यांसारख्या विविध उपक्रमांवरही त्यांनी प्रकाश टाकला.

👨‍🏫 ‘ग्लोबल गुरुजी’कडे बारामतीची वाटचाल

जिल्हा परिषद अध्यक्ष वीरधवल जगदाळे यांनी शिक्षक आणि विद्यार्थ्यांची गुणवत्ता वाढविण्यासाठी जिल्हा परिषद प्रयत्नशील असल्याचे सांगितले. कै. अजितदादा यांच्या संकल्पनेतून मॉडेल स्कूल तसेच ‘ग्लोबल गुरुजी’ यांसारखे उपक्रम राबविले जात असून, नासा आणि इस्रोमध्ये जाणाऱ्या विद्यार्थ्यांची संख्याही वाढत असल्याचे त्यांनी नमूद केले.

पंचायत समिती सभापती किरण तावरे यांनी तालुक्यातील अंगणवाड्या व जिल्हा परिषद शाळांमध्ये सोलर सुविधा, मुलींसाठी आरोग्य तपासणी तसेच स्पर्धा परीक्षांच्या तयारीसाठी निधी उपलब्ध करून देण्याबाबत माहिती दिली. शाळांमध्ये संगणक लॅब आणि आधुनिक प्रयोगशाळा उभारण्यासाठी सहकार्य करण्याचे आवाहनही त्यांनी केले.

📚 बारामती तालुक्यात ६५ जिल्हा परिषद शाळा

गटविकास अधिकारी किशोर माने यांनी प्रास्ताविकात बारामती तालुक्यातील शिक्षण क्षेत्राचा आढावा घेतला. तालुक्यातील ६५ जिल्हा परिषद शाळांमध्ये ११ हजारांहून अधिक विद्यार्थी शिक्षण घेत आहेत. आरटीईअंतर्गत प्रवेश, मॉडेल स्कूलची कामे, शिक्षक भरती तसेच ‘मिशन ३००’ अंतर्गत सुरू असलेल्या विविध कामांची माहिती त्यांनी दिली.

कार्यक्रमाला जिल्हा परिषद अध्यक्ष वीरधवल जगदाळे, उपसभापती विवेक वळसे पाटील, पंचायत समिती सभापती किरण तावरे, उपसभापती शुभांगी आगवणे, नगराध्यक्ष सचिन सातव, उपविभागीय अधिकारी उत्तम दिघे, गटविकास अधिकारी किशोर माने, तहसीलदार स्वप्नील रावडे, आरोग्य अधिकारी मनोज खोमणे यांच्यासह जिल्हा परिषद-पंचायत समिती सदस्य, आजी-माजी लोकप्रतिनिधी, आदर्श शिक्षक, गुणवंत विद्यार्थी आणि पालक उपस्थित होते.