‘एक पेशंट, एक झाड’ ते आरोग्यरत्न! मेहता दाम्पत्याच्या सेवाकार्याचा गौरव!

‘एक पेशंट, एक झाड’ ते आरोग्यरत्न! मेहता दाम्पत्याच्या सेवाकार्याचा गौरव!

एबीपी माझाच्या पुरस्कार सोहळ्यात वैद्यकीय व सामाजिक कार्याचा सन्मान; ग्रामीण आरोग्यसेवेतील योगदानाची दखल

बारामती वार्तापत्र 

ग्रामीण भागातील रुग्णांना दर्जेदार आणि अत्याधुनिक आरोग्यसेवा उपलब्ध करून देण्याच्या ध्येयाने कार्यरत असलेल्या बारामतीच्या मेहता मल्टीस्पेशालिटी हॉस्पिटलचे संस्थापक डॉ. विशाल मेहता व डॉ. निकिता मेहता यांना ‘आरोग्यरत्न पुरस्कार २०२६’ प्रदान करण्यात आला. वैद्यकीय क्षेत्रातील उल्लेखनीय योगदानासह सामाजिक बांधिलकी जपणाऱ्या त्यांच्या कार्याचा एबीपी माझाच्या वतीने मुंबई येथे आयोजित भव्य पुरस्कार सोहळ्यात गौरव करण्यात आला.

महाराष्ट्राचे सार्वजनिक आरोग्य व कुटुंब कल्याण मंत्री प्रकाश आबिटकर आणि सामाजिक कार्यकर्त्या अमृता फडणवीस यांच्या उपस्थितीत हा सन्मान प्रदान करण्यात आला. या पुरस्कारामुळे बारामतीच्या आरोग्यसेवेच्या शिरपेचात आणखी एक मानाचा तुरा रोवला गेला आहे.

झारगडवाडीतून सुपरस्पेशालिटी हॉस्पिटलपर्यंत प्रेरणादायी प्रवास

बारामती तालुक्यातील झारगडवाडी या ग्रामीण भागातून वैद्यकीय क्षेत्रात वाटचाल करणाऱ्या मेहता दाम्पत्याने २००८ मध्ये मर्यादित साधनसामग्रीत मेहता नर्सिंग होमची सुरुवात केली. रुग्णांचा विश्वास, अथक परिश्रम आणि सेवाभाव या बळावर त्यांनी आरोग्यसेवेचा विस्तार केला.

काळानुसार या छोट्याशा नर्सिंग होमचे रूपांतर अत्याधुनिक मेहता मल्टीस्पेशालिटी हॉस्पिटलमध्ये झाले. ग्रामीण भागातील रुग्णांना उपचारांसाठी महानगरांकडे धाव घ्यावी लागू नये, या उद्देशाने विविध वैद्यकीय सुविधा एकाच छताखाली उपलब्ध करून देण्यात आल्या आहेत.

३५ हून अधिक तज्ज्ञ डॉक्टरांची टीम; ३० हून अधिक वैद्यकीय विभाग

मेहता मल्टीस्पेशालिटी हॉस्पिटलमध्ये ३० हून अधिक वैद्यकीय विशेष विभाग आणि ३५ हून अधिक तज्ज्ञ डॉक्टरांच्या माध्यमातून रुग्णांना विविध प्रकारच्या आरोग्यसेवा दिल्या जात आहेत.

युरोलॉजी, नेफ्रोलॉजी, डायलिसिस, ऑर्थोपेडिक्स, जॉइंट रिप्लेसमेंट, कॅथ लॅब, प्लास्टिक सर्जरी तसेच विंका आयव्हीएफ टेस्ट ट्यूब बेबी सेंटर यांसारख्या सुपरस्पेशालिटी सुविधा रुग्णांसाठी उपलब्ध आहेत.

शासकीय आरोग्य योजनांसह विविध खासगी विमा कंपन्यांच्या माध्यमातून कॅशलेस उपचारांची सुविधाही उपलब्ध करून देण्यात आली आहे. त्यामुळे सर्वसामान्य रुग्णांना उपचार मिळविणे अधिक सुलभ होत आहे.

‘एक पेशंट, एक झाड’ उपक्रमातून पर्यावरण संवर्धन

वैद्यकीय सेवेबरोबरच सामाजिक आणि पर्यावरणीय बांधिलकी जपण्याचे काम मेहता दाम्पत्य करत आहे. ‘एक पेशंट, एक झाड’ या अभिनव उपक्रमाच्या माध्यमातून प्रत्येक प्रसूतीनंतर रुग्णाच्या कुटुंबाला एक झाड भेट दिले जाते.

या उपक्रमातून आतापर्यंत १० हजारांहून अधिक झाडांचे वाटप करण्यात आले आहे. आरोग्यसेवेबरोबरच पर्यावरण संवर्धनाचा संदेश देणारा हा उपक्रम समाजासाठी प्रेरणादायी ठरत आहे.

वात्सल्य फाउंडेशनच्या माध्यमातून गरजू रुग्णांना मदतीचा हात

वात्सल्य फाउंडेशनच्या माध्यमातून गरजू रुग्णांना आर्थिक मदत देण्याचे कार्यही सुरू आहे. तसेच संपूर्ण महाराष्ट्रात मोफत वंध्यत्व निवारण शिबिरांचे आयोजन करून हजारो महिलांच्या मातृत्वाच्या स्वप्नांना आधार देण्याचा प्रयत्न करण्यात आला आहे.

वैद्यकीय उपचारांपलीकडे जाऊन गरजू कुटुंबांना मदत करणे, महिलांच्या आरोग्यविषयक समस्यांवर मार्गदर्शन करणे आणि समाजात आरोग्याबाबत जागरूकता निर्माण करणे, या विविध उपक्रमांमधून मेहता दाम्पत्याची सामाजिक बांधिलकी अधोरेखित होते.

पुरस्कारामुळे सेवाकार्याला नवी प्रेरणा

ग्रामीण भागातील रुग्णांना महानगरांच्या धर्तीवर दर्जेदार, सर्वसमावेशक आणि अत्याधुनिक आरोग्यसेवा उपलब्ध करून देण्याच्या कार्याची दखल घेत मेहता दाम्पत्याला हा पुरस्कार प्रदान करण्यात आला.

या सन्मानामुळे मेहता हॉस्पिटलच्या संपूर्ण टीमसह शुभचिंतकांमध्ये आनंदाचे वातावरण निर्माण झाले आहे. भविष्यातही अधिक गुणवत्तापूर्ण आरोग्यसेवा देण्याचा संकल्प मेहता दाम्पत्याने व्यक्त केला आहे.

हा पुरस्कार केवळ एका दाम्पत्याचा सन्मान नसून ग्रामीण भागातील आरोग्यसेवेसाठी समर्पित असलेल्या मेहता हॉस्पिटल परिवाराच्या सेवाभावी कार्याची पावती मानली जात आहे.