तुमच्या दुचाकीला हवा मनपसंत नंबर? बारामती आरटीओकडून नवीन मालिका जाहीर!

तुमच्या दुचाकीला हवा मनपसंत नंबर? बारामती आरटीओकडून नवीन मालिका जाहीर!

आकर्षक क्रमांकासाठी ६ नोव्हेंबरला अर्ज स्वीकारणार; एकाच क्रमांकासाठी अनेक अर्ज आल्यास होणार लिलाव

बारामती वार्तापत्र 

आपल्या दुचाकीला आकर्षक आणि मनपसंत नोंदणी क्रमांक मिळविण्याची संधी वाहनधारकांना उपलब्ध होणार आहे. बारामती उपप्रादेशिक परिवहन कार्यालयात (आरटीओ) खाजगी दुचाकी वाहनांसाठी ‘एमएच ४२ बी झेड’ या नवीन नोंदणी क्रमांक मालिकेची सुरुवात करण्यात येणार आहे. या मालिकेतील आकर्षक तसेच पसंतीचे क्रमांक राखून ठेवण्यासाठी इच्छुक वाहनधारकांनी विहित नमुन्यात अर्ज करण्याचे आवाहन उपप्रादेशिक परिवहन अधिकारी सुरेंद्र निकम यांनी केले आहे.

आकर्षक क्रमांकासाठी ६ नोव्हेंबरला अर्ज

खाजगी दुचाकी वाहनांसाठी आकर्षक तसेच पसंतीचे क्रमांक मिळविण्यासाठी ६ नोव्हेंबर २०२६ रोजी सकाळी १०.३० ते दुपारी ३ वाजेपर्यंत अर्ज स्वीकारले जाणार आहेत. अर्जासोबत संबंधित क्रमांकाचे विहित शुल्क भरावे लागणार आहे.

एखाद्या विशिष्ट क्रमांकासाठी एकापेक्षा अधिक अर्ज प्राप्त झाल्यास संबंधित अर्जदारांची यादी १२ नोव्हेंबर रोजी सकाळी १०.३० वाजता कार्यालयाच्या सूचना फलकावर प्रसिद्ध करण्यात येईल.

जास्त रक्कम भरणाऱ्याला मिळणार पसंतीचा नंबर

एकाच आकर्षक क्रमांकासाठी अनेक अर्ज आल्यास संबंधित अर्जदारांना लिलाव प्रक्रियेत सहभागी होता येणार आहे. यासाठी अर्जदारांनी जास्त रकमेचा धनाकर्ष (डिमांड ड्राफ्ट) १२ नोव्हेंबर रोजी दुपारी ३.३० वाजेपर्यंत कार्यालयात सीलबंद पाकिटात जमा करावा.

त्याच दिवशी दुपारी ४ वाजता सहायक प्रादेशिक परिवहन अधिकारी यांच्या कक्षात उपस्थित पात्र अर्जदारांसमोर सीलबंद पाकिटे उघडण्यात येतील. विहित शुल्कापेक्षा सर्वाधिक रकमेचा धनाकर्ष सादर करणाऱ्या अर्जदाराला संबंधित पसंतीचा क्रमांक वितरित केला जाणार आहे.

अर्जासोबत आवश्यक कागदपत्रे

आकर्षक नोंदणी क्रमांकासाठी अर्ज करताना पत्त्याचा पुरावा, छायाचित्र असलेले ओळखपत्र आणि पॅनकार्डची स्वाक्षांकित प्रत जोडणे आवश्यक आहे. तसेच ‘DY RTO, BARAMATI’ या नावाने राष्ट्रीयकृत किंवा अनुसूचित बँकेचा बारामती येथील धनाकर्ष अर्जासोबत सादर करावा.

क्रमांक राखून ठेवल्यानंतर बदल शक्य नाही

एकदा राखून ठेवलेला नोंदणी क्रमांक बदलून देता येणार नाही. तसेच नोंदणी क्रमांक राखीव ठेवण्यासाठी भरलेले शुल्क परत मिळणार नसल्याचे आरटीओ प्रशासनाने स्पष्ट केले आहे.

त्यामुळे आकर्षक क्रमांकासाठी अर्ज करणाऱ्या वाहनधारकांनी आवश्यक कागदपत्रे, शुल्क आणि अर्जातील तपशील काळजीपूर्वक तपासूनच अर्ज सादर करावा, असे आवाहन उपप्रादेशिक परिवहन अधिकारी सुरेंद्र निकम यांनी केले आहे.

महत्त्वाचे : आकर्षक क्रमांकासाठी अर्ज करण्याची अंतिम वेळ ६ नोव्हेंबर रोजी दुपारी ३ वाजेपर्यंत असून, एकाच क्रमांकासाठी अनेक अर्ज आल्यास लिलावाची प्रक्रिया १२ नोव्हेंबर रोजी पार पडणार आहे.