जय पवारांच्या हरकतीनंतर जगताप पॅनेलला दणका! ‘अजित पवार’ नाव-फोटोचे प्रचार साहित्य हटवण्याचे आदेश

जय पवारांच्या हरकतीनंतर जगताप पॅनेलला दणका!
‘अजित पवार’ नाव-फोटोचे प्रचार साहित्य हटवण्याचे आदेश!

जय अजितदादा पवार यांच्या हरकतीनंतर निवडणूक निर्णय अधिकाऱ्यांचा पुरुषोत्तम जगतापांना आदेश; फ्लेक्स, बॅनर्स, पोस्टर्स, स्टिकर्स हटवून अनुपालन अहवाल सादर करण्याच्या सूचना

बारामती वार्तापत्र 

श्री सोमेश्वर सहकारी साखर कारखान्याच्या पंचवार्षिक निवडणुकीच्या पार्श्वभूमीवर प्रचार साहित्यामध्ये ‘अजितदादा पवार / अजित पवार’ या नावाचा किंवा प्रतिमेचा वापर केल्याच्या तक्रारीवरून निवडणूक निर्णय अधिकाऱ्यांनी कारवाईचे निर्देश दिले आहेत. निवडणूक निर्णय अधिकारी दिग्विजय आहेर यांनी पॅनेल प्रमुख पुरुषोत्तम रामराजे जगताप यांना यासंदर्भात लेखी आदेश दिला आहे.

दस्तऐवजानुसार, जय अजितदादा पवार यांनी 30 सप्टेंबर 2026 रोजी हरकत अर्ज सादर केला होता. त्यामध्ये संबंधित प्रचार साहित्यामध्ये ‘अजितदादा पवार / अजित पवार’ यांचे नाव व प्रतिमा वापरली जात असल्याबाबत आक्षेप नोंदवण्यात आला होता. या प्रकरणी कार्यालयाकडून यापूर्वी तोंडी तसेच दूरध्वनीद्वारे सूचना देण्यात आल्याचा उल्लेखही आदेशात आहे.

निवडणूक निर्णय अधिकाऱ्यांच्या आदेशानुसार, ‘अजितदादा पवार / अजित पवार’ यांचे नाव किंवा प्रतिमा असलेले फ्लेक्स, बॅनर्स, पोस्टर्स, स्टिकर्स, पत्रके तसेच अन्य मुद्रित, इलेक्ट्रॉनिक किंवा डिजिटल प्रचार साहित्याचा वापर तात्काळ थांबविण्याचे निर्देश देण्यात आले आहेत. तसेच संबंधित प्रचार साहित्य तत्काळ काढून टाकण्यास सांगण्यात आले आहे.

याबाबतची आवश्यक कार्यवाही पूर्ण केल्यानंतर लेखी ‘अनुपालन अहवाल’ (Compliance Report) निवडणूक निर्णय अधिकाऱ्यांच्या कार्यालयात सादर करण्याचे आदेश देण्यात आले आहेत. आदेशात, त्यानंतरही संबंधित नाव अथवा प्रतिमेचा प्रचार साहित्यामध्ये वापर आढळल्यास तो निवडणूक प्रक्रियेतील निर्देशांचे उल्लंघन मानला जाऊ शकतो, असे नमूद करण्यात आले आहे.

आदेशामध्ये महाराष्ट्र सहकारी संस्था अधिनियम, महाराष्ट्र सहकारी संस्था (समिती निवडणूक) नियम तसेच राज्य सहकारी निवडणूक प्राधिकरणाच्या निर्देशांचा संदर्भ देण्यात आला आहे. निवडणूक प्रक्रिया सुरू असल्याने आदेशाचे पालन करणे आवश्यक असल्याचेही स्पष्ट करण्यात आले आहे.

पुरुषोत्तम जगताप यांच्या पॅनेलकडून या आदेशावर अद्याप कोणती भूमिका मांडण्यात आली आहे, याची माहिती या पत्रातून उपलब्ध होत नाही. त्यामुळे पुढील प्रचारात संबंधित पॅनेल कोणती भूमिका घेते आणि प्रचार साहित्याबाबत काय बदल केले जातात, याकडे आता लक्ष लागले आहे.