इंदापूर नगरपरिषदेचा 100% शासकीय माफी प्रस्ताव मंजूर; बारामतीबाबत अद्याप अनिश्चितता, नागरिकांमध्ये संभ्रम

इंदापूर नगरपरिषदेचा 100% शासकीय माफी प्रस्ताव मंजूर; बारामतीबाबत अद्याप अनिश्चितता, नागरिकांमध्ये संभ्रम

दिरंगाईमुळे बारामतीचा प्रस्ताव रखडला ?

बारामती वार्तापत्र 

इंदापूर नगरपरिषदेचा 100 टक्के शासकीय माफी (कर/शुल्क सवलत) प्रस्ताव राज्य व केंद्र सरकारकडून मंजूर झाल्याची माहिती समोर आली असून, या निर्णयामुळे इंदापूर शहरात समाधान व्यक्त केले जात आहे. मात्र याच पार्श्वभूमीवर बारामती शहराबाबत अद्याप स्पष्टता नसल्याने नागरिकांमध्ये संभ्रम आणि नाराजी वाढत आहे.

दिवंगत उपमुख्यमंत्री अजित पवार यांच्या निधनानंतर बारामतीतील विविध विकासकामांची गती मंदावल्याची चर्चा सध्या शहरात जोर धरत आहे. विशेषतः शासकीय माफीसंदर्भातील प्रस्तावाबाबत कोणतीही ठोस माहिती पुढे न आल्याने “बारामतीचा प्रस्ताव मंजूर झाला का?” असा प्रश्न नागरिक उपस्थित करत आहेत.

दरम्यान, इंदापूर नगरपरिषदेचे नगराध्यक्ष यांनी माध्यमांशी बोलताना त्यांच्या शहराचा 100 टक्के शासकीय माफी प्रस्ताव मंजूर झाल्याचे स्पष्ट केले. त्यामुळे बारामतीकरांमध्येही अशाच निर्णयाची अपेक्षा निर्माण झाली आहे.

मात्र प्रशासनाकडून याबाबत अद्याप अधिकृत घोषणा करण्यात आलेली नाही. स्थानिक नागरिकांच्या मते, मागील व सध्याच्या मुख्याधिकाऱ्यांच्या दिरंगाईमुळे बारामतीचा प्रस्ताव रखडला असल्याची शक्यता व्यक्त केली जात आहे.

आवश्यक कागदपत्रे, प्रस्ताव सादरीकरण आणि पाठपुरावा यामध्ये विलंब झाल्याने बारामतीला या निर्णयाचा लाभ मिळण्यात अडथळे निर्माण झाल्याचे बोलले जात आहे.

या सर्व घडामोडींमुळे बारामतीतील नागरिकांमध्ये नाराजीचे वातावरण असून, प्रशासनाने लवकरात लवकर याबाबत स्पष्ट भूमिका घ्यावी आणि प्रस्ताव मंजुरीसाठी आवश्यक ती पावले उचलावीत, अशी मागणी जोर धरत आहे.

आता इंदापूरप्रमाणे बारामतीलाही 100 टक्के शासकीय माफीचा लाभ कधी मिळणार, याकडे सर्वांचे लक्ष लागले आहे.