सुपे घाटातील अपघातग्रस्त विद्यार्थ्यांच्या भेटीला युगेंद्र पवार; हर्ष हॉस्पिटलमध्ये घेतली प्रकृतीची आस्थेने विचारपूस

सुपे घाटातील अपघातग्रस्त विद्यार्थ्यांच्या भेटीला युगेंद्र पवार; हर्ष हॉस्पिटलमध्ये घेतली प्रकृतीची आस्थेने विचारपूस

‘उपचारात कोणतीही कमतरता राहू नये’

चौफुला : प्रतिनिधि

बारामती तालुक्यातील सुपे घाटात शालेय विद्यार्थ्यांना घेऊन जाणाऱ्या एसटी बसला झालेल्या अपघातात जखमी झालेल्या विद्यार्थ्यांची राष्ट्रवादी काँग्रेस शरदचंद्र पवार पक्षाचे युवा नेते युगेंद्र पवार यांनी चौफुला येथील हर्ष मल्टीस्पेशालिटी हॉस्पिटलमध्ये जाऊन भेट घेतली.

अपघाताची माहिती मिळाल्यानंतर युगेंद्र पवार यांनी रुग्णालयात दाखल असलेल्या विद्यार्थ्यांची प्रत्यक्ष भेट घेऊन त्यांच्या प्रकृतीची आस्थेने विचारपूस केली. विद्यार्थ्यांना झालेल्या दुखापतींबाबत तसेच त्यांच्यावर सुरू असलेल्या उपचारांची त्यांनी माहिती घेतली.

यावेळी त्यांनी उपचार करणाऱ्या डॉक्टरांशी चर्चा करून प्रत्येक जखमी विद्यार्थ्याच्या प्रकृतीचा सविस्तर आढावा घेतला. विद्यार्थ्यांची वैद्यकीय स्थिती, त्यांना देण्यात येत असलेले उपचार तसेच पुढील उपचारांबाबतही त्यांनी डॉक्टरांकडून माहिती जाणून घेतली.

उपचारात कोणतीही कमतरता राहू नये, यासाठी चर्चा

जखमी विद्यार्थ्यांना आवश्यक ते उपचार तातडीने आणि योग्य पद्धतीने मिळावेत, तसेच उपचारादरम्यान कोणतीही कमतरता राहू नये, यासाठी युगेंद्र पवार यांनी डॉक्टर व रुग्णालय प्रशासनाशी चर्चा केली.

विद्यार्थ्यांच्या कुटुंबीयांशीही त्यांनी संवाद साधत परिस्थितीची माहिती घेतली. अपघातामुळे निर्माण झालेल्या परिस्थितीत विद्यार्थ्यांना आणि त्यांच्या पालकांना आवश्यक वैद्यकीय मदत व सहकार्य मिळणे महत्त्वाचे असल्याचे त्यांनी यावेळी सांगितले.

सुपे घाटातील अपघाताची पार्श्वभूमी

दरम्यान, पाटसहून सुप्याच्या दिशेने शालेय विद्यार्थ्यांना घेऊन जाणाऱ्या एसटी बसला सुपे घाटात अपघात झाला होता. घाट चढताना बस अचानक मागे सरकल्याने चालकाचे नियंत्रण सुटले आणि बस रस्त्याच्या कडेला जाऊन पलटी झाल्याची प्राथमिक माहिती आहे.

बस मध्ये सुमारे २५ ते ३० विद्यार्थी प्रवास करत होते. या अपघातात काही विद्यार्थ्यांना दुखापत झाली असून त्यांच्यावर चौफुला येथील हर्ष मल्टीस्पेशालिटी हॉस्पिटलमध्ये उपचार सुरू आहेत.

अपघातानंतर प्रशासन आणि पोलिसांनी घटनास्थळी धाव घेतली होती. दरम्यान, अपघाताचे नेमके कारण काय होते, याबाबत संबंधित यंत्रणांकडून तपास सुरू आहे.

जखमी विद्यार्थ्यांच्या प्रकृतीची विचारपूस करण्यासाठी युगेंद्र पवार यांनी रुग्णालयात घेतलेली भेट ही या दुर्घटनेनंतर विद्यार्थ्यांच्या उपचारांकडे लक्ष वेधणारी ठरली.