ऊसतोडीसाठी निघाले अन् काळाने गाठले! मुर्टीजवळ भीषण अपघात; महिला मजुराचा मृत्यू

ऊसतोडीसाठी निघाले अन् काळाने गाठले! मुर्टीजवळ भीषण अपघात; महिला मजुराचा मृत्यू

ट्रॅक्टरला ओव्हरटेक करण्याचा प्रयत्न

बारामती वार्तापत्र 

बारामती तालुक्यातील मुर्टी गावाजवळ ऊसतोड मजुरांच्या ट्रॅक्टरची ट्रॉली उलटून भीषण अपघात झाला. या दुर्घटनेत एका महिला ऊसतोड मजुराचा जागीच मृत्यू झाला असून, ट्रॉलीमध्ये प्रवास करणारे अन्य अनेक मजूर जखमी झाले आहेत. जखमींना तातडीने उपचारासाठी बारामती येथील रुग्णालयात दाखल करण्यात आले. या घटनेमुळे परिसरात हळहळ व्यक्त केली जात आहे.

मिळालेल्या माहितीनुसार, गुरुवार, दि. १२ नोव्हेंबर रोजी सायंकाळी पाच वाजण्याच्या सुमारास सातारा जिल्ह्यातील अजिंक्यतारा साखर कारखान्याकडे ऊसतोडीसाठी दोन ट्रॅक्टरमधून मजूर प्रवास करत होते. हे दोन्ही ट्रॅक्टर मुर्टी गावाजवळ आले असताना एका ट्रॅक्टर चालकाने पुढे असलेल्या ट्रॅक्टरला ओव्हरटेक करण्याचा प्रयत्न केला. मात्र, याचवेळी एका ट्रॅक्टरचे चाक दुसऱ्या ट्रॅक्टरच्या ट्रॉलीमध्ये अडकल्याने चालकाचे नियंत्रण सुटले आणि काही क्षणांतच ट्रॉली रस्त्यावर उलटली.

या ट्रॉलीमध्ये अंदाजे १५ ते २० ऊसतोड मजूर बसले होते. ट्रॉली अचानक उलटल्याने त्यातील मजुरांची मोठी धावपळ उडाली. अनेक मजूर ट्रॉलीखाली किंवा ट्रॉलीतील सामानामध्ये अडकल्याने त्यांना दुखापती झाल्या. या भीषण अपघातात एका महिला ऊसतोड मजुराचा जागीच मृत्यू झाला. अचानक घडलेल्या या दुर्घटनेमुळे घटनास्थळी काही काळ गोंधळाचे वातावरण निर्माण झाले होते.

अपघाताची माहिती मिळताच जखमींना मदत करण्यासाठी हालचाली सुरू झाल्या. जखमी मजुरांना तातडीने बारामती येथील रुग्णालयात उपचारासाठी दाखल करण्यात आले. त्यांच्यावर वैद्यकीय उपचार सुरू असून, अपघातातील जखमींची नेमकी संख्या आणि त्यांच्या प्रकृतीबाबत अधिक माहिती समोर येणे बाकी आहे.

दरम्यान, सध्या ऊसतोडीचा हंगाम सुरू असल्याने हजारो मजूर आपल्या कुटुंबीयांसह एका जिल्ह्यातून दुसऱ्या जिल्ह्यात ऊसतोडीसाठी प्रवास करत आहेत. अनेकदा ट्रॅक्टरच्या ट्रॉलीमधून मोठ्या संख्येने मजुरांची वाहतूक केली जाते. अशा प्रवासात क्षमतेपेक्षा अधिक मजूर बसवणे, सुरक्षिततेच्या उपाययोजनांचा अभाव आणि वाहन चालवताना होणारी घाई यामुळे अपघातांचा धोका वाढतो.

मुर्टीजवळ घडलेल्या या दुर्दैवी अपघाताने ऊसतोड मजुरांच्या सुरक्षित प्रवासाचा प्रश्न पुन्हा एकदा ऐरणीवर आणला आहे. रोजीरोटीसाठी घरदार सोडून ऊसतोडीसाठी निघालेल्या मजुरांच्या प्रवासातच अशा दुर्घटना घडत असल्याने त्यांच्या सुरक्षित वाहतुकीसाठी संबंधित यंत्रणांनी गांभीर्याने लक्ष देण्याची गरज व्यक्त होत आहे.