बारामतीत ‘आईची सेवा, हीच भक्ती!’; नवरात्रोत्सवापूर्वी दोन मंदिरांची स्वच्छता
‘आईची सेवा, हीच आमची भक्ती!’ — भक्तिभावातून स्वच्छतेचा आणि सामाजिक बांधिलकीचा संदेश
बारामतीत ‘आईची सेवा, हीच भक्ती!’; नवरात्रोत्सवापूर्वी दोन मंदिरांची स्वच्छता
‘आईची सेवा, हीच आमची भक्ती!’ — भक्तिभावातून स्वच्छतेचा आणि सामाजिक बांधिलकीचा संदेश
बारामती वार्तापत्र
नवरात्रोत्सवाचे औचित्य साधत धार्मिक स्थळांची स्वच्छता आणि सेवा करण्याच्या उद्देशाने मंदिर स्वच्छता सेवा मंडळाच्या वतीने माळावरची श्री तुळजाभवानी आई मंदिर तसेच नगरमधील श्री गणेश मंदिराची स्वच्छता करण्यात आली. मंडळातील सदस्यांनी एकत्र येत भक्तिभावाने आणि सेवाभावनेने हा उपक्रम राबवला.
माळावरची श्री तुळजाभवानी आई मंदिर हे भाविकांच्या श्रद्धेचे आणि ऐतिहासिक महत्त्वाचे स्थान मानले जाते. नवरात्रोत्सवाच्या पार्श्वभूमीवर या पवित्र स्थळाची स्वच्छता करून देवीची सेवा करण्याचा संकल्प मंडळाने केला होता. त्यानुसार सदस्यांनी मंदिर परिसर स्वच्छ करण्यासाठी पुढाकार घेतला. याचबरोबर नगरमधील श्री गणेश मंदिराचीही स्वच्छता करण्यात आली.
भक्तीला स्वच्छतेची जोड!
देवदर्शनाबरोबरच मंदिर परिसर स्वच्छ आणि सुंदर ठेवणे हीदेखील भाविकांची जबाबदारी आहे, हा संदेश या उपक्रमातून देण्यात आला. धार्मिक स्थळांची स्वच्छता ही केवळ उत्सवापुरती मर्यादित न राहता वर्षभर जपली जावी, अशी भावना या सेवाकार्यामागे आहे.
मंडळातील सदस्यांनी मंदिराची स्वच्छता ही केवळ सामाजिक जबाबदारी म्हणून नव्हे, तर आई तुळजाभवानीच्या चरणी अर्पण केलेली सेवा म्हणून केली. सामूहिक सहभागातून धार्मिक श्रद्धा, स्वच्छतेची जाणीव आणि समाजाप्रती असलेली बांधिलकी यांचा सुंदर संगम या उपक्रमात पाहायला मिळाला.
देवीच्या चरणी समाजसेवेचा संकल्प
स्वच्छता मोहिमेदरम्यान मंडळाच्या सदस्यांनी आई तुळजाभवानीच्या चरणी नतमस्तक होत, आपल्या हातून अशीच चांगली, समाजोपयोगी आणि सेवाभावी कार्ये घडत राहावीत, अशी प्रार्थना केली.
‘आई तुळजाभवानीची कृपा आणि आशीर्वाद सदैव आमच्यावर राहू देत. समाजाच्या हितासाठी आणि धार्मिक स्थळांच्या सेवेसाठी आमच्या हातून सातत्याने चांगली कामे घडू देत,’ अशी भावना मंडळाच्या वतीने व्यक्त करण्यात आली.
सेवेतून भक्ती, स्वच्छतेतून संस्कार!
मंदिर स्वच्छता सेवा मंडळाने राबवलेल्या या उपक्रमातून धार्मिक श्रद्धेसोबतच स्वच्छतेचे महत्त्व अधोरेखित झाले. नवरात्रोत्सवाच्या निमित्ताने मंदिर परिसर स्वच्छ ठेवण्याचा हा सेवाभावी प्रयत्न भाविकांसाठी प्रेरणादायी ठरणारा आहे.
