“वय लहान, विचार महान! प्रतापगड साकारत चिमुकल्या राजने दिली ‘भीमाशंकर वाचवा’ची हाक!”

“वय लहान, विचार महान! प्रतापगड साकारत चिमुकल्या राजने दिली ‘भीमाशंकर वाचवा’ची हाक!”

हातात कला, मनात इतिहास अन् पर्यावरणाची चिंता!

बारामती वार्तापत्र 

वय लहान असले तरी विचार मोठे असतील, तर कल्पकतेच्या जोरावर समाजाचे लक्ष वेधून घेता येते, याचा प्रत्यय बारामती तालुक्यातील पणदरे येथील चिचबनमधील चिमुकल्या राज गणेश जगताप याने दिला आहे. आपल्या कलात्मक कल्पकतेतून ऐतिहासिक प्रतापगड किल्ल्याची आकर्षक प्रतिकृती साकारत त्याने इतिहासाविषयीची आवड जपली आहे. विशेष म्हणजे, केवळ ऐतिहासिक वारसा सादर करण्यापुरते मर्यादित न राहता ‘भीमाशंकर वाचवा’ या प्रदर्शनाच्या माध्यमातून पर्यावरण संवर्धनाचा महत्त्वपूर्ण संदेशही दिला आहे.

राजने साकारलेल्या प्रतापगड किल्ल्याच्या प्रतिकृतीतून महाराष्ट्राच्या गौरवशाली इतिहासाची ओळख करून देण्याचा प्रयत्न केला आहे. छत्रपती शिवाजी महाराजांच्या शौर्याची आणि गड-किल्ल्यांच्या ऐतिहासिक महत्त्वाची आठवण करून देणारी ही कलाकृती लक्षवेधी ठरत आहे.

याचबरोबर राजने ‘भीमाशंकर वाचवा’ या विषयाला आपल्या प्रदर्शनातून विशेष स्थान दिले आहे. औद्योगिक प्रकल्पांमुळे भीमाशंकर परिसरातील जंगल, वनसंपदा आणि जैवविविधतेवर संभाव्य परिणाम होऊ शकतात, या विषयाकडे त्याने लक्ष वेधले आहे. निसर्गाचे संवर्धन करणे, जंगलांचे संरक्षण करणे आणि पर्यावरणाचा समतोल राखणे किती महत्त्वाचे आहे, हे त्याने आपल्या उपक्रमातून मांडले आहे.

आजच्या काळात लहान मुलांमध्ये मोबाईल आणि डिजिटल मनोरंजनाचे आकर्षण वाढत असताना राजने इतिहास, कला आणि पर्यावरण अशा तीन महत्त्वपूर्ण विषयांची सांगड घातली आहे. त्याच्या या उपक्रमातून बालवयातच सामाजिक जाणीव आणि पर्यावरणाविषयीची संवेदनशीलता विकसित होण्याचे महत्त्व अधोरेखित होते.

एका बाजूला प्रतापगडाच्या माध्यमातून इतिहासाचा अभिमान, तर दुसऱ्या बाजूला ‘भीमाशंकर वाचवा’च्या माध्यमातून निसर्ग संवर्धनाची हाक! राज गणेश जगताप याच्या या कल्पक उपक्रमाचे परिसरातून कौतुक होत असून, त्याच्या कलागुणांना आणि सामाजिक जाणिवेला प्रोत्साहन मिळत आहे