एचडीएफसी बँकच्या वतीने रक्तदान शिबिराचे आयोजन;52 रक्तदात्यांचा सहभाग 

“एका थेंबातून अनेकांचे जीव वाचू शकतात”

इंदापूर –

सामाजिक बांधिलकीची जाण ठेवत एचडीएफसी बँक, इंदापूर शाखेच्या वतीने “परिवर्तन उपक्रमांतर्गत” भव्य रक्तदान शिबिराचे आयोजन शुक्रवारी करण्यात आले होते. या शिबिरास नागरिकांनी उत्स्फूर्त प्रतिसाद देत एकूण 52 रक्तदात्यांनी स्वेच्छेने रक्तदान करून मानवतावादी कार्याला सहकार्य केले.

या शिबिरात रक्तसंकलनाची जबाबदारी मुक्ताई ब्लड बँकेचे अविनाश ननवरे यांनी पार पाडली. कार्यक्रमाचे उद्घाटन ऑपरेशन मॅनेजर नितीन पाटील व शाखाधिकारी शिवानंद पाटील यांच्या शुभहस्ते करण्यात आले. प्रमुख पाहुण्यांनी रक्तदानाचे महत्त्व अधोरेखित करत, “रक्तदान हे सर्वश्रेष्ठ दान असून, एका थेंबातून अनेकांचे जीव वाचू शकतात,” असे सांगत नागरिकांना अशा उपक्रमात अधिकाधिक सहभागी होण्याचे आवाहन केले.

HDFC बँकेच्या देशव्यापी संकल्पनेनुसार “कोणालातरी वाचवण्याची भावना” (Feeling of Saving Someone) या अभियानांतर्गत हे शिबिर आयोजित करण्यात आले होते. या भावनेने प्रेरित होत अनेकांनी प्रथमच रक्तदान करून सामाजिक कार्यात हातभार लावला. शिबिरात बँकेचे अधिकारी, कर्मचारी, ग्राहक तसेच शहरातील नागरिकांनी उल्लेखनीय सहभाग नोंदवला. कार्यक्रमाच्या यशस्वीतेसाठी बँकेचे अधिकारी ऑपरेशन मॅनेजर नितीन पाटील, गोड लोन अधिकारी अनिकेत भंडारी, शाखाधिकारी शिवानंद पाटील, पिक कर्ज अधिकारी हर्षद शहाणे, सूर्यकांत पटणे, कुमार कदम, किशोर पाडूळे, अमोल राऊत यांच्यासह सर्व सहकारी कर्मचारी व अधिकारी यांनी विशेष परिश्रम घेतले.

शिबिरातील शिस्तबद्ध व्यवस्थापन, रक्तदात्यांची नोंदणी, आरोग्य तपासणी, तसेच अन्य सर्व सोयींची उत्तम आखणी करण्यात आली. हा उपक्रम केवळ एक सामाजिक घटना नसून, समाजासाठी प्रेरणादायी पाऊल ठरला आहे. एचडीएफसी बँक इंदापूर शाखेने समाजातील जबाबदारी जपून मानवी मूल्यांना अधोरेखित करणारा हा प्रशंसनीय उपक्रम राबविल्याबद्दल सर्व स्तरातून कौतुक व्यक्त केले जात आहे.