बारामतीत व्यापारी महासंघ;समस्या सोडवण्याचा प्रभावी प्रयत्न

बारामतीत व्यापारी महासंघ;समस्या सोडवण्याचा प्रभावी प्रयत्न

दर महिन्याच्या शेवटच्या शनिवारी नियमितपणे व्यापारी बैठका आयोजित

बारामती वार्तापत्र

शहरातील व्यापाऱ्यांच्या विविध अडचणी आणि प्रश्न सोडवण्यासाठी बारामती व्यापारी महासंघाच्या वतीने आयोजित करण्यात आलेली बैठक उत्साहात पार पडली. या बैठकीला बारामती शहरासह परिसरातील मोठ्या संख्येने व्यापाऱ्यांनी हजेरी लावून आपापल्या समस्या मांडल्या.

बैठकीत व्यापाऱ्यांनी मांडलेल्या अडचणींमध्ये प्रामुख्याने करसंबंधित मुद्दे, परवाने, पार्किंगची समस्या, स्वच्छता, वीजपुरवठा तसेच स्थानिक प्रशासनाशी संबंधित विविध प्रश्नांचा समावेश होता. महासंघाच्या पदाधिकाऱ्यांनी या सर्व समस्या बारकाईने ऐकून घेतल्या आणि संबंधित स्तरावर तात्काळ तोडगा काढण्यासाठी आवश्यक त्या उपाययोजना सुचवल्या. अनेक किरकोळ समस्या जागेवरच मार्गी लावण्यात आल्याने व्यापाऱ्यांनी समाधान व्यक्त केले.

या बैठकीस बारामती नगर परिषदेचे नगराध्यक्ष सचिन शेठ सातव यांनी विशेष उपस्थिती दर्शवून व्यापाऱ्यांशी थेट संवाद साधला. त्यांनी नगर परिषदेच्या कार्यपद्धतीबाबत माहिती देत व्यापाऱ्यांच्या अडचणी समजून घेतल्या आणि प्रशासनाच्या माध्यमातून त्या सोडविण्यासाठी सकारात्मक भूमिका घेतली जाईल, असे आश्वासन दिले.

बारामती व्यापारी महासंघाचे अध्यक्ष सुशीलकुमार सोमानी यांनी यावेळी बोलताना सांगितले की, व्यापाऱ्यांच्या समस्या वेळेवर सोडवण्यासाठी अशा बैठका अत्यंत उपयुक्त ठरत आहेत. त्यामुळे दर महिन्याच्या शेवटच्या शनिवारी नियमितपणे व्यापारी बैठका आयोजित करण्यात येणार असून, अधिकाधिक व्यापाऱ्यांनी यात सहभागी व्हावे, असे आवाहन त्यांनी केले.

या बैठकीला कार्याध्यक्ष जगदीश शेठ पंजाबी, उपाध्यक्ष शैलेश साळुंखे, सचिव स्वप्निल मोठा, सहसचिव प्रशांत चांदगुडे, खजिनदार महेश ओसवाल तसेच कमिटी सदस्य संजय दुधाळ, पारस खटावकर, श्याम तीवाटणे आदी पदाधिकारी उपस्थित होते. याशिवाय महावीर पथ व्यापारी असोसिएशनचे अध्यक्ष मनोज खुटाळे तसेच शहरातील अनेक प्रतिष्ठित व्यापाऱ्यांनीही सहभाग नोंदवला.

एकूणच, या बैठकीमुळे व्यापाऱ्यांच्या समस्या जलदगतीने सोडवण्यास चालना मिळणार असून, व्यापारी वर्गात सकारात्मक आणि सहकार्याचे वातावरण निर्माण होण्यास मदत होणार आहे.