बारामती तालुक्यात कोयत्याचा धुमाकूळ? काऱ्हाटीत तरुणावर भरदिवसा हल्ला

बारामती तालुक्यात कोयत्याचा धुमाकूळ? काऱ्हाटीत तरुणावर भरदिवसा हल्ला

डोकं, हातासह शरीरावर वार; पुण्यात उपचार सुरू, प्रकृती चिंताजनक असल्याची माहिती

बारामती वार्तापत्र 

बारामती तालुक्यातील काऱ्हाटी गावात भरदिवसा एका तरुणावर कोयत्याने हल्ला झाल्याची धक्कादायक घटना समोर आली आहे. अमोल सदाशिव जाधव या तरुणावर गावाच्या मुख्य चौकात कोयत्याने वार करण्यात आल्याचे सांगण्यात येत आहे.

मिळालेल्या माहितीनुसार, हल्लेखोरांनी अमोल जाधव यांच्या डोक्यावर, हातावर तसेच शरीराच्या इतर भागांवर कोयत्याने वार केल्याचा आरोप आहे. या हल्ल्यात ते गंभीर जखमी झाले असून, त्यांना तातडीने उपचारासाठी पुण्यात दाखल करण्यात आल्याची माहिती आहे. त्यांची प्रकृती चिंताजनक असल्याचे सांगण्यात येत आहे.

पूर्ववैमनस्यातून हल्ला?

हा हल्ला पूर्ववैमनस्यातून झाल्याचा प्राथमिक अंदाज व्यक्त केला जात आहे. दरम्यान, काऱ्हाटी येथील ऋतिक आणि ओमकार या दोघांचा हल्ल्यात सहभाग असल्याचा आरोप/संशय व्यक्त केला जात असून, याची अधिकृत पुष्टी तपासातून होणे बाकी आहे.

घटनेची माहिती मिळताच पोलीस घटनास्थळी दाखल झाले. संशयितांचा शोध घेण्यासाठी पोलिसांची पथके बारामती तालुक्यातील विविध ठिकाणी रवाना झाल्याची माहिती आहे.

भरदिवसा गावच्या मुख्य चौकात झालेल्या या हल्ल्यामुळे काऱ्हाटी परिसरात खळबळ उडाली असून, नागरिकांमध्ये भीतीचे वातावरण निर्माण झाले आहे. पोलिसांकडून हल्ल्यामागील नेमके कारण, सहभागी व्यक्ती आणि घटनेचा संपूर्ण तपशील तपासला जात आहे.